क्‍लासेसचालकाची आत्महत्या

औरंगाबाद - सातारा परिसरातील एमपीएससी क्‍लासेसचालकाने रविवारी (ता. ११) मध्यरात्री राहत्या घरात गळफास लावून आत्महत्या केली. ही घटना सोमवारी (ता. १२) पहाटे उघडकीस आली. वैभव कोल्हाटकर (वय ५४, मूळ रा. नगर, ह.मु. सातारा परिसर) असे क्‍लासेसचालकाचे नाव आहे.  

पोलिसांनी दिलेली माहिती अशी - वैभव कोल्हाटकर यांच्या पत्नीचे दोन वर्षांपूर्वी निधन झाले. एक वर्षापासून ते सातारा परिसरातील कासलीवाल मार्व्हल येथे तिसऱ्या मजल्यावरील फ्लॅटमध्ये किरायाने राहत होते. ते एमपीएससीचे क्‍लास घेत होते. त्यांची मुलगी प्रणिती इयत्ता दहावीत शिक्षण घेते. दिवाळीनिमित्त मामाकडे पुणे येथे ता. सात नोव्हेंबरला वैभव कोल्हाटकर यांनी तिला सोडले. त्यानंतर ता. आठ नोव्हेंबरला त्यांचा मुलीशी शेवटचा संपर्क झाला होता. ता. अकरा नोव्हेंबरला मध्यरात्री वैभव कोल्हाटकर यांनी राहत्या घरी गळफास घेतला. घटनेची माहिती शेजाऱ्यांनी सातारा पोलिसांना दिली. दरम्यान, सहायक फौजदार नारायण बऱ्हाटे व त्यांच्या पथकाने घटनास्थळी धाव घेतली. आतून दरवाजाला कडी असल्याने अग्निशामक दलाच्या जवानामार्फत दरवाजा उघडून त्यांना घाटी रुग्णालयात दाखल करण्यात आले. घटनेची माहिती सातारा पोलिसांनी कोल्हाटकर यांच्या मुलीला दिली. यानंतर तिने सविस्तर जबाब पोलिस ठाण्यात दिला. या घटनेप्रकरणी अकस्मात मृत्यूची नोंद सातारा पोलिस ठाण्यात करण्यात आली.

कुत्रे भुंकल्याने घटना उघडकीस
कोल्हाटकर यांच्या घरात दोन कुत्री होती. ते वारंवार भुंकत असल्याने शेजाऱ्यांनी घटनेची माहिती पोलिसांना दिली. पोलिसांनी दरवाजा उघडताच आत्महत्येचा प्रकार उघडकीस आला. कोल्हाटकर यांच्या पत्नीचे दोन वर्षांपूर्वी निधन झाले. तेव्हापासून ते मानसिक तणावात होते. त्यातूनच आत्महत्या केली असावी, असा पोलिसांचा कयास आहे.