घरफोडी करणाऱ्या दोन चोरट्यांना इचलकरंजीत अटक

इचलकरंजी - येथील स्थानिक गुन्हे शाखेने घरफोडी करणाऱ्या दोन चोरट्यांना जेरबंद केले आहे. त्यांच्याकडून सुमारे १६ घरफोडीचे गुन्हे उघडकीस आले आहेत. यामध्ये गेल्या काही दिवसापासून जयसिंगपूर येथे झालेल्या घरफोडींचा  समावेश आहे. या चोरट्यांकडून तब्बल ४ लाख १७ हजार रुपये किमतीचा मुद्देमाल हस्तगत केला आहे. लक्ष्मण उर्फ लकी मारुती नाईक उर्फ सनदी (वय २६, रा. माधवनगर, सांगली, मूळ होसुर, बेळगाव व  राघवेंद्र उर्फ नागराज शंभू शेट्टी (वय २७, राहणार माधवनगर, सांगली, मुळगाव इडगुंजी, ता. कारवार) अशी त्यांची नावे आहेत.

त्यांच्यावर कर्नाटकात चोरी, जबरी चोरी व घरफोडीचे गुन्हे दाखल आहेत. गेल्या काही दिवसापासून जयसिंगपूर परिसरात चोरीच्या अनेक घटना घडल्या होत्या. त्या पार्श्वभूमीवर पोलीस चोरट्यांचा शोध घेत होते. त्यामध्ये रेल्वे स्टेशन - उदगाव जाणारे  बायपासवर सापळा रचून स्थानिक गुन्हे शाखेने या दोघांना ताब्यात घेतले. त्यांच्याकडे चोरीतील सोन्याचे दागिने सापडले. ते सेंट्रींग काम करतात. त्यांच्याकडून आणखीन काही चोरीचे गुन्हे उघडकीस येण्याची शक्यता आहे.

याबाबतची माहिती अप्पर पोलीस अधीक्षक श्रीनिवास घाडगे यांनी दिली. यावेळी इचरकंजी स्थानिक गुन्हे शाखेचे सहाय्यक पोलीस निरीक्षक विकास जाधव, जयसिंगपूर ठाण्याचे सहाय्यक पोलीस निरीक्षक दत्तात्रय बोरीगिड्डे उपस्थित होते.