पुण्यात 88 लाखांचे कोकेन जप्त

पुणे  शहरातील उच्चभ्रू वस्तीमध्ये कोकेन पुरवठा करणाऱ्या एका नायजेरीयनला अटक करून त्याच्याकडून तब्बल 88 लाख रुपयांचे 733 ग्रॅम कोकेन जप्त केले आहे. पोलिसांनी एका महिन्याच्या आत दुसरी मोठी कारवाई केली आहे.

शोलोडॉये सॅम्युअल जॉय (वय 44, रा. रावत कॅप्सस्टोन सोसायटी, उंड्री) याला अटक केली आहे. जॉय हा नायजेरीयन असून, त्याचा कपड्यांचा व्यापार असल्याचे सांगून तो बिझनेस व्हीसावर फेब्रुवारी महिन्यात पुण्यात आला आहे. काही काळ तो मुंबईतही राहिला आहे. तो त्याच्या फ्लॅटमध्ये कोकेनच्या छोट्या पुड्या तयार करून त्या उच्चभ्रू वस्तीवस्ती नशेखोरांना विकत असल्याची माहिती गुन्हे शाखेला मिळाली. त्यानुसार पोलिस निरीक्षक विजय टेकाळे यांचे पथक तयार करण्यात आले. त्यांच्या पथकातील अविनाश शिंदे, राहूल जोशी, महेंद्र पवार, प्रफुल्ल साबळे, मनोज साळुंखे, अमित छडीदार योगेश मोहिते यांनी जॉयच्या फ्लॅटवर छापा मारून त्याला ताब्यात घेतले. त्याच्याकडून 87 लाक 96 हजार रुपयांचे 733 ग्रॅम कोकेन, 3.68 लाख रोख रक्कम, पाच मोबाईल, तीन घड्याळ, वजन काटा व प्लास्टिकच्या पिशव्या असा एकूण 91 लाख 79 हजार 70 रुपयांचा ऐवज जप्त केला, अशी माहिती अतिरिक्त पोलिस आयुक्त अशोक मोराळे यांनी दिली.