लाच घेताना तहसीलदाराला अटक

गडचिरोली : विटाभट्टीच्या परवान्यासाठी एका व्यावसायिकाकडून पाच हजार रुपयांची लाच घेताना आरमोरी येथील तहसीलदार यशवंत तुकाराम धाईत याला लाचलुचपत प्रतिबंधक विभागाच्या अधिकाऱ्यांनी आज, मंगळवारी अटक केली.
आरमोरी येथील वीटभट्टी व्यावसायिकाने परवान्यासाठी तहसील कार्यालयात अर्ज केला होता. या कामासाठी त्यांनी 7 हजार 870 रुपयांचे चालान जिल्हा सहकारी बॅंकेत भरले होते. मात्र, त्यांना अनेक दिवस मंजुरी मिळाली नाही. संबंधित व्यावसायिकाने तहसीलदार धाईत यांची भेट घेतली असता, परवाना देण्यासाठी त्यांनी पाच हजार रुपयांची मागणी केली. व्यावसायिकाने लाचलुचपत प्रतिबंधक विभागाकडे तक्रार केली. आज, मंगळवारी दुपारी तहसील कार्यालयात सापळा रचून पाच हजारांची लाच घेताना तहसीलदाराला पकडण्यात आले.