स्वाभिमानी दूध संघाचा गाईचे दूध स्वीकारण्यास नकार

सकाळ वृत्तसेवा
सोमवार, 28 मे 2018

कोल्हापूर - स्वाभिमानी शेतकरी संघटनेचे खासदार राजू शेट्टी संस्थापक असलेल्या स्वाभिमानी दूध संघाने १ जून पासून ज्या संस्था म्हशीचे दूध स्वत: विक्री करतात आणि गाईचे दूध स्वभिमानीला देतात अशा पन्नास दुग्ध संस्थांना १ जून पासून गाईचे दूध संघास घालू नये, असे पत्रक काढले आहे. दुधाच्या दरासाठी लढा देणाऱ्या स्वाभिमानी शेतकरी संघटनेनेच असा आदेश दुग्ध संस्थांना काढल्याने उत्पादकांत आश्‍चर्य व्यक्त होत आहे.

कोल्हापूर - स्वाभिमानी शेतकरी संघटनेचे खासदार राजू शेट्टी संस्थापक असलेल्या स्वाभिमानी दूध संघाने १ जून पासून ज्या संस्था म्हशीचे दूध स्वत: विक्री करतात आणि गाईचे दूध स्वभिमानीला देतात अशा पन्नास दुग्ध संस्थांना १ जून पासून गाईचे दूध संघास घालू नये, असे पत्रक काढले आहे. दुधाच्या दरासाठी लढा देणाऱ्या स्वाभिमानी शेतकरी संघटनेनेच असा आदेश दुग्ध संस्थांना काढल्याने उत्पादकांत आश्‍चर्य व्यक्त होत आहे.

जिल्ह्यात गाईच्या दुधाला ३.५ ला फॅटला २५ रुपये दर दिला जातो. सध्या कोल्हापूर जिल्ह्यात गाईचे दूध अतिरिक्त होत आहे. पावडरीलाही दर नसल्याने पावडर प्लॅन्ट धारकही दूध खरेदी करण्यास तयार नाही किंवा कमी किमतीने दूध खरेदी करत असल्याने संघाचा गाईच्या दुधापासून होणारा तोटा वाढल्याचे संघाचे मुख्य कार्यकरी अधिकारी महावीर पाटील यांनी सांगितले. जादा दराने दूध खरेदी करून कमी दरात त्याची विक्री करण्याची वेळ संघावर आल्याने संघ आर्थिक नुकसानीत जाण्याअगोदर आम्ही दुग्ध संस्थांना याबाबतच्या सूचना दिल्याचे श्री. पाटील यांनी सांगितले. 

संघाकडे जवळ जवळ ३६ हजार लिटर गाईच्या दुधाचे संकलन होते. यापैकी बरेचसे दूध विक्री अभावी शिल्लक राहात असल्याने दररोज हजारो रुपयांचा तोटा आम्हाला होत आहे. हे सहन करणे शक्‍य नसल्याने केवळ गाईच्या दुधाचा पुरवठा करणाऱ्या दुग्ध संस्थांना आम्ही दूध पाठवू नका, अशा सूचना केल्या आहे. ज्या दुग्ध संस्था म्हैस आणि गाय या दोन्हीचे समान पद्धतीने दूध पाठवतात त्यांचे दूध मात्र आम्ही घेणार असल्याचे श्री. पाटील यांनी या वेळी स्पष्ट केले.

अन्य संघांकडून निर्बंध नाहीत
स्वाभिमानीने हा निर्णय घेऊन उत्पादकांना झटका दिला असला, तरी इतर संघांनी मात्र सध्या तरी गाईचे दूध खरेदी बंद करण्याबाबत आमचा विचार नसल्याचे स्पष्ट केले आहे. जिल्ह्यात गोकुळ, वारणासह अन्य सहकारी संस्था आहेत. या संस्थांनाही अडचणी असल्या, तरी सभासद संख्या जास्त आहे. यामुळे या संस्था गाय दूध न स्वीकारण्याचा निर्णय घेण्याची शक्‍यता कमी असल्याचे सूत्रांनी सांगितले.

Web Title: swabhimani shetkari sanghatana cow milk