अहमदनगर : पोलिसांची ठाण्यातच दिवाळी साजरी

नेवासे : शासकीय, निमशासकीय कर्मचारी कुटुंबीयांसमवेत दिवाळीचा आनंद साजरा करीत असतानाच, नागरिकांची दिवाळी आनंदात साजरी व्हावी, यासाठी पोलिसांना ‘ऑन ड्यूटी’च हा सण साजरा करावा लागतो, मात्र कुठलीही तक्रार न करता जनतेची सुरक्षा हाच आमचा सण असल्याची भावना ते बोलून दाखवतात.

समाजातील सर्व घटकांतून दिवाळी सण उत्साहात साजरा केला जातो. कामासाठी शहरात गेलेले नागरिक दिवाळीसाठी गावाकडे येतात. दिवाळी आली की आप्तांकडे जाण्याची ओढा सर्वांना लागलेली असते. घरात तयार केलेल्या गोडधोड पदार्थांपासून खमंग चिवड्याचा आस्वाद घेत परिवारासमवेत दिवाळी साजरी केली जाते. या धामधुमीत पोलिसांना मात्र सणाचा आनंद घेता येत नाही.

दिवाळी सणामुळे बसस्थानक, बाजारपेठा, मंदिरे आदी ठिकाणी नागरिकांची गर्दी होणार, हे लक्षात घेऊन अशा ठिकाणी पोलिसांचा बंदोबस्त तैनात करण्यात येतो. ऐन सणासुदीत घातपाती कारवाया होऊ नयेत, यासाठी पोलिसांना डोळ्यांत तेल घालून रात्रंदिवस बंदोबस्तासाठी थांबावे लागते. पोलिसांचे संख्याबळ कमी असल्याने कामाचा ताणही मोठा असतो. त्यामुळे आहे त्या कर्मचाऱ्यांवर कायदा व सुव्यवस्था राखण्याबरोबरच गुन्ह्यांचा तपास करणे, रात्रीची गस्त, चौकी सांभाळणे आदी कामे पोलिसांना करावी लागतात. त्यामुळे त्यांची दिवाळी ठाण्यातच साजरी होते. मात्र, जनतेने सुरक्षित सण साजरा केल्याचे समाधानही त्यांच्या चेहऱ्यावर असते.

महिला पोलिसांची अडचण

दिवाळीनिमित्त घरात फराळ बनविण्याचे मुख्य काम गृहिणी करतात. मात्र, महिला पोलिसांना कामावरून रजा मिळत नसल्याने, वेळात वेळ काढून घरी जाऊन फराळ बनवावा लागतो. शिवाय, दिवाळीसाठी सून सासरी यावी, अशी सासरच्यांची इच्छा असते. मात्र, सुटी मिळत नसल्याने तेही शक्य होत नाही. भाऊबीजेलाही भावाला ओवाळता येईल याची शाश्‍वती नसते, अशी भावना महिला पोलिस कर्मचाऱ्याने व्यक्त केली.

समाजात शांतता व सुव्यवस्था राखणे, हेच आमचे कर्तव्य आहे. तेच आमचे सण- उत्सव आहेत. कर्तव्य बजावताना त्याग हा करावाच लागतो. त्यातच आम्हाला आनंद असतो. त्यामुळे सणा-सुदीच्या काळातही कर्तव्य पार पाडतो.

- बाजीराव पोवार, पोलिस निरीक्षक, नेवासे