फ्लिपकार्टने कर्मचाऱ्यांना केले मालामाल

नवी दिल्ली - ई-कॉमर्स कंपनी फ्लिपकार्टने आपल्या कर्मचाऱ्यांना मालामाल केले आहे. कंपनीने एम्प्लॉई स्टॉक ऑप्शन्सअंतर्गत (ईएसओपी) कर्मचाऱ्यांकडे असलेले ६७० कोटी रुपयांचे शेअर्स परत घेतले असून, याचा तीन हजारांहून अधिक कर्मचाऱ्यांना फायदा होणार आहे. खासगी कंपनीकडून करण्यात आलेली ही आतापर्यंतची सर्वांत मोठी ‘ईएसओपी’ योजना आहे. स्टार्टअप कंपनीतील ही सर्वांत मोठी बायबॅक योजना आहे. 

फ्लिपकार्ट समूहाचे कर्मचारी ‘बायबॅक ऑफर’मध्ये सहभागी झाले असून, देशातील सर्वांत मोठ्या ‘ईएसओपी रिपर्चेज प्रोग्रॅममध्ये सहभागी झाले आहेत. ही बायबॅक ऑफर फ्लिपकार्ट, मिंत्रा, जबाँग आणि फोन-पेच्या सर्व कर्मचाऱ्यांना देण्यात आली आहे. फ्लिपकार्टने कर्मचाऱ्यांना स्टॉक परत करण्याची आतापर्यंत पाचवी संधी देऊ केली आहे. 

‘कर्मचारी आमची ताकद असून, त्यांच्याशिवाय फ्लिपकार्ट ई-कॉमर्स क्षेत्रात वरच्या स्थानावर पोचली नसती. ‘ईएसओपी रिपर्चेज प्रोग्रॅम आम्ही कर्मचाऱ्यांना त्यांनी घेतलेली मेहनत आणि कठीण परिश्रम यासाठी आभार मानण्याचे माध्यम म्हणून राबवतो’, असे फ्लिपकार्टचे अध्यक्ष सचिन बन्सल आणि समूहाचे सीईओ बिन्नी बन्सल यांनी सांगितले.