शंभर रुपयांच्या नव्या नोटा आणणार- आरबीआय

मुंबई - रिझर्व्ह बँकेने (आरबीआय) लवकरच शंभर रुपयांच्या नव्या नोटा चलनात आणण्याची घोषणा केली आहे. महात्मा गांधी सिरीज-2005 मधील नोटांप्रमाणेच नव्या नोटांची रचना असणार आहे, असे आरबीआयने सांगितले आहे. मात्र, नव्या नोटांचा आगमनानंतर या मूल्याच्या जुन्या नोटादेखील वापरात राहतील असे आरबीआयने स्पष्ट केले आहे

नव्या नोटेच्या दोन्ही नंबर पॅनल्सवर 'आर' हे इन्सेट लेटर आणि विद्यमान गव्हर्नर ऊर्जित पटेलांची सही असेल. या नोटेवर '2017' हे वर्ष छापले जाईल. या नोटेच्या नंबर पॅनलवरील आकड्यांचा आकार चढत्या क्रमाने असेल. याशिवाय, 'ब्लीड लाइन्स' आणि ओळख पटवण्यासाठी मोठ्या आकारातील खूण ही या नोटेची वैशिष्ट्ये आहेत. 

केंद्र सरकारने नोव्हेंबर महिन्यात पाचशे व एक हजार रुपयांच्या नोटा बाद करण्याची घोषणा केली. त्याऐवजी, दोन हजार आणि पाचशे रुपयांच्या नव्या नोटा जारी करण्यात आल्या. यानंतर, आरबीआयने वीस रुपये आणि पन्नास रुपयांच्या नव्या नोटा जारी करण्याची घोषणा केली आहे.