शेअर बाजाराला ‘ट्रम्प अन्‌ नोटे’चा धक्का

पीटीआय
गुरुवार, 10 नोव्हेंबर 2016

अमेरिकेच्या अध्यक्षीय निवडणुकीत रिपब्लिकन पक्षाचे उमेदवार डोनाल्ड ट्रम्प यांचा झालेला अनपेक्षित विजय आणि केंद्र सरकारने पाचशे व हजाराच्या नोटा बाद केल्याने शेअर बाजारावर दुहेरी आघात झाला. सुरवातीला मोठ्या प्रमाणात कोसळलेला शेअर बाजार नंतर खरेदीचा जोर वाढल्याने काही प्रमाणात सावरण्यास मदत झाली. 

- विनोद नायर, संशोधन प्रमुख, जिओजित बीएनपी परिबास फायनान्शियल सर्व्हिसेस

सेन्सेक्‍समध्ये मोठे चढउतार; निर्देशांक ३३२ अंशांनी कोसळला 
मुंबई - अमेरिकेच्या अध्यक्षपदी डोनाल्ड ट्रम्प निवडून आल्याने आणि सरकारने पाचशे व हजारच्या नोटा बंद केल्यामुळे शेअर बाजारात बुधवारी मोठी अस्थिरता निर्माण झाली. मुंबई शेअर बाजाराचा निर्देशांक सेन्सेक्‍स सकाळी तब्बल १ हजार ६८९ अंशांनी कोसळला, तर राष्ट्रीय शेअर बाजाराचा निर्देशांक निफ्टी ५४१ अंशांनी गडगडला. मात्र, नंतर सुरू झालेल्या खरेदीच्या जोरामुळे सेन्सेक्‍स सावरून ३३८ अंशांच्या घसरणीसह बंद झाला. 

आज सकाळी बाजार सुरू झाल्यानंतर सेन्सेक्‍सची घसरगुंडी सुरू झाली. याला जगभरातील शेअर बाजारांमध्ये सुरू असलेल्या घसरणीने आणखी गती दिली. निर्देशांक २५ हजार ९०२ या नीचांकी पातळीवर पोचला. त्यानंतर ब्लू चिप कंपन्यांच्या समभागांवर खरेदीचा जोर वाढला. त्यामुळे निर्देशांक १ हजार ४९५ अंशांनी सावरला. अखेर तो कालच्या तुलनेत ३३८ अंश म्हणजेच १.२३ टक्‍क्‍याने घसरून २७ हजार २५२ अंशांवर बंद झाला. निफ्टी सकाळी ८ हजार १०० अंशांच्या खाली आला. त्यानंतर तो सावरला. कालच्या तुलनेत १११ अंश म्हणजेच १.३१ टक्‍क्‍याने घसरून तो ८ हजार ४३२ अंशांवर बंद झाला. 

जगभरातील शेअर बाजारांत घसरगुंडी 
उद्योगपती डोनाल्ड ट्रम्प यांनी मुरब्बी राजकीय नेत्या हिलरी क्‍लिंटन यांचा अमेरिकेच्या अध्यक्षपदाच्या निवडणुकीत पराभव केल्याने जगभरातील शेअर बाजारांना धक्का बसला. आशियाई देशांतील जपानच्या निक्केई निर्देशांकात ५.३६ टक्के, हाँगकाँगच्या हॅंगसेंगमध्ये २.१६ आणि चीनच्या शांघाय निर्देशांकात ०.६२ टक्के घसरण झाली. युरोपीय देशांतील ब्रिटनच्या एफटीएसईमध्ये ०.१४, फ्रान्स सीएसी १.१० आणि जर्मनी डॅक्‍स १.०३ टक्के घसरण सुरवातीच्या सत्रात झाली.

Web Title: Stock market shock Trump and ccurrency