ABG Shipyard : सीबीआयची संचालकांविरोधात लुकआउट नोटीस

नवी दिल्ली : देशातील २८ बँकांकडून सुमारे २२ हजार कोटींहून अधिक रक्कमेची कर्जे घेऊन त्याचा गैरवापर केल्याप्रकरणाची एबीजी शिपयार्ड (ABG Shipyard) या गुजरातमधील कंपनीविरोधात आता सीबीआयनं (CBI) कडक पावलं उचलली आहेत. दोन दिवसांपूर्वी या प्रकरणाचा मोठा खुलासा झाला होता, त्यामुळं आता सीबीआयनं एबीजी शिपयार्डचे संचालक आणि प्रमोटर्सविरोधात लुक आऊट नोटीस काढली आहे. हा देशाच्या इतिहासातील सर्वात मोठा बँक घोटाळा आहे. (ABG Shipyard fraud case Look out notice issued against director Rishi Agarwal others)

इंडिया टुडेच्या वृत्तानुसार, एबीजी शिपयार्डचे संचालक आणि प्रमोटर्स असलेले ऋषी अग्रवाल, संथानम मुथास्वामी, अश्वनी कुमार, सुशील कुमार अग्रवाल, रवि विमल नेवेटिया यांनी देश सोडून पळून जाऊ नये यासाठी सर्व सीमा अधिकाऱ्यांना सीबीआयकडून नोटीस पाठवण्यात आली आहे. दरम्यान, सीबीआयचे प्रवक्ते आरसी जोशी यांनी सांगितलं की, “आरोपी भारतात आहेत. सीबीआयनं आरोपींविरुद्ध लुक आऊट सर्क्युलर (एलओसी) आधीच काढले होते. यापूर्वी, स्टेट बँक ऑफ इंडियानं सन 2019 मध्ये मुख्य आरोपींविरुद्ध लूक आऊट नोटीसा काढल्या होत्या”

एबीजी शिपयार्ड, एकेकाळी भारतातील सर्वात मोठी खाजगी शिपयार्ड फर्म आहे. सीबीआयनं 28 बँकांची 22,800 कोटी रुपयांची फसवणूक केल्याबद्दल या कंपनीविरोधात गुन्हा दाखल केला आहे. देशातील आतापर्यंतचं हे सर्वात मोठं बँक फसवणूक प्रकरण आहे.

लूट आऊट नोटीस म्हणजे काय?

कोणत्याही आरोपीला देशातून पळून जाण्यापासून रोखण्यासाठी त्यांच्याविरुद्ध लुकआउट नोटीस जारी केली जाते. लुकआऊट नोटिसमध्ये, तपास एजन्सी आंतरराष्ट्रीय विमानतळ अधिकारी, बंदरांचे अधिकारी आणि इतर देशांच्या सीमेवरील रस्त्यांवरील सुरक्षा दलांना आरोपींनी देशातून पळून जाण्याचा प्रयत्न केल्यास त्यांना पकडण्याच्या सूचना दिल्या जातात.