धक्कादायक! रेल्वे स्टेशनवर दिव्यांग अल्पवयीन मुलीवर सामूहिक बलात्कार

रेल्वे स्टेशनवर एका 17 वर्षीय दिव्यांग मुलीवर सामूहिक बलात्कार केल्याची धक्कादायक घटना उघडकीस आली. हा प्रकार सुरत रेल्वे स्टेशनवरील असून या प्रकरणी सुरत रेल्वे पोलिसांनी आरोपींना अटक केली. हि अल्पवयीन पिडीत तरुणी एका 18 वर्षीय मित्रासोबत घरातून पळून आली होती.(gangrape of 17 years disabled girl at Surat railway station)

पोलिसांच्या माहितीनुसार या दोघांनी घरातून पळून आल्यानंतर आपल्या उदर्निर्वाहासाठी प्रयत्न सुरू केले होते. यावरुनच रेल्वे स्टेशन वरील सफाई कर्मचारी म्हणून काम करणाऱ्या दोन तरूणांनी पैसे कमवायचे असेल तर रात्रीच्या वेळी रेल्वे स्टेशनच्या आरक्षण केंद्रावर रांगेत उभे राहण्यास सांगितले होते.

यानंतर २२ मे रोजी रात्री तरुण १७ वर्षीय तरुणीला रेल्वे स्टेशन वर सोडून रेल्वे स्टेशनच्या आरक्षण केंद्रावर रांगेत उभे राहायला गेला. मात्र या दरम्यान दोन नराधमांनी डाव साधला आणि तरुणीवर बलात्कार केला.

२३ मे रोजी मुलीचा मित्र परत आला तेव्हा तरुणीने त्याला संपुर्ण प्रकार सांगितला. याप्रकरणी तरुणाने पोलिसात गुन्हा दाखल केला आणि चौकशी दरम्यान आरोपींनी गुन्ह्याची कबुली दिल्यानंतर पोलिसांनी दोन आरोपीस अटक केली.