महिला पोलिस कर्मचाऱ्यावर ऍसिड हल्ला

वेल्लूर (तमिळनाडू) : एका महिला पोलिस कर्मचाऱ्यावर अज्ञात व्यक्तीने केलेल्या ऍसिड हल्ल्यात महिलेचा चेहरा आणि उजवा हात भाजला आहे.

येथील महिला पोलिस स्थानकात काम करणाऱ्या लावण्या या शुक्रवारी रात्री काम संपवून घरी निघाल्या होत्या. दरम्यान, गणवेशात असलेल्या लावण्यावर चेहरा झाकून आलेल्या एका अज्ञात व्यक्तीने ऍसिडचा हल्ला केला. या हल्ल्यात लावण्याच्या डोळ्याला इजा पोहोचली आहे. त्यामुळे त्यांची दृष्टि गेली असल्याचे डॉक्टरांनी सांगितले आहे. त्यांच्यावर सध्या एका स्थानिक रुग्णालयात उपचार सुरू आहेत. पोलिसांनी या प्रकरणी गुन्हा दाखल केला आहे. मात्र, अद्यापही हल्लेखोर सापडलेला नाही. हल्लेखोराला शोधण्यासाठी पोलिसांनी पाच जणांचे विशेष पथक स्थापन केले आहे.

दरवर्षी महिलांवर हजारो ऍसिड हल्ले होतात. मात्र त्यापैकी काही हल्ल्यांचीच अधिकृतपणे नोंद होते. हल्लेखोर बदला घेईल, या भावनेने अनेक हल्ल्यांबद्दल तक्रार केली जात नाही. निर्भया प्रकरणानंतर 2013 साली नागरिकांच्या दबावामुळे ऍसिड हल्ला हा स्वतंत्र गुन्हा मानण्यात येत आहे. बहुतेक हल्ले हे एकतर्फी प्रेमातून केले जातात. त्याशिवाय ऍसिडची सहज उपलब्धता असल्यानेही हल्लेखोरांना भारतात प्रोत्साहन मिळत असल्याचे आढळून आले आहे.