सकाळ वृत्तसेवा

पिंपरी - पिंपरी-चिंचवडच्या महापौरपदाबाबत राष्ट्रवादी कॉंग्रेसचे प्रमुख कार्यकर्ते व नगरसेवकांची मते जाणून घेण्यासाठी पक्षाचे नेते ऊर्जामंत्री अजित पवार गुरुवारी पिंपरी-चिंचवड शहरात येत असून, महापौरपदासाठी इच्छुक असलेल्या नगरसेवकांच्या हालचालींना बुधवारी वेग आला. कार्यकर्त्यांचा मेळावा व नगरसेवकांच्या बैठकीत आपल्या नावाला पाठिंबा मिळावा, यासाठी इच्छुकांचे जोरदार प्रयत्न सुरू आहेत.

येत्या एक डिसेंबर रोजी महापौर-उपमहापौरपदासाठी निवडणूक होणार आहे. महापौरपदासाठी योगेश बहल, महेश लांडगे, प्रशांत शितोळे, दत्तात्रेय साने, विठ्ठल ऊर्फ नाना काटे, रामआधार धारिया, एकनाथ मोटे, सिद्धेश्‍वर बारणे या आठ जणांनी, तर उपमहापौरपदासाठी गणेश भोंडवे, काळुराम पवार, हिरानंद ऊर्फ डब्बू आसवानी, शांता आल्हाट, प्रभाकर वाघेरे आणि सुजाता नांदगुडे या सहा जणांनी पक्षाकडे उमेदवारी मागितली आहे. महापालिकेतील सत्तारूढ पक्षनेते जगदीश शेट्टी यांच्याकडे इच्छुकांनी अर्ज दिले आहेत.

आमदार विलास लांडे यांचे समर्थक लांडगे आणि साने, आमदार लक्ष्मण जगताप यांचे समर्थक शितोळे आणि काटे; तसेच बहल हे पाच जण महापौरपदासाठी प्रमुख इच्छुक आहेत. या पाचही जणांनी गेल्या अनेक दिवसांपासून मोर्चेबांधणी सुरू केली आहे. महापौरपदाची निवडणूक जाहीर झाल्यानंतर त्यांच्या हालचाली वाढल्या. श्री. पवार यांच्या उपस्थितीत गुरुवारी कार्यकर्त्यांचा मेळावा आणि नगरसेवकांची बैठक होणार असल्याचे जाहीर झाल्याने इच्छुकांच्या हालचालींनी वेग घेतला. लांडगे यांच्यासाठी आमदार लांडेसमर्थक नगरसेवकांनी मंगळवारी बैठक घेऊन लांडगे यांच्या उमेदवारीसाठी पवार यांना निवेदन देण्याची तयारी केली. मात्र, या मुद्द्यावरून बैठकीत साने यांचा नगरसेवकांशी वाद झाला. त्यामुळे उमेदवारीसाठी ते आक्रमक झाले आहेत.

त्यानंतर आमदार जगताप यांच्या समर्थकांनी शितोळे यांच्या नावासाठी बुधवारी बैठक घेतली. श्री. जगताप यांच्या कार्यालयात झालेल्या या बैठकीस शितोळे, विठ्ठल काटे, खंडू कोकणे, राजेंद्र राजापुरे, कैलास थोपटे, शंकर जगताप आदी दहा ते बारा नगरसेवक उपस्थित होते. या सर्वांनी शितोळे किंवा काटे यांना उमेदवारी देण्यात यावी, अशी मागणी जगताप यांच्याकडे केली.

दुसरीकडे बहल यांनी नगरसेवकांशी संपर्क मोहीम सुरू केली. प्रत्येक नगरसेवकाची प्रत्यक्ष भेट घेऊन किंवा दूरध्वनीवरून संपर्क साधून पाठिंब्याची विनंती केली. आमदार जगताप आणि अण्णा बनसोडे यांच्याशीही संपर्क साधून उमेदवारीसाठी त्यांनी विनंती केली. पक्षनेते शेट्टी यांनी बहल यांच्या नावाला जाहीर पाठिंबा व्यक्त केला असून, समर्थक नगरसेवकांनी श्री. पवार यांच्याकडे त्यांच्या नावाचा आग्रह धरण्याचे ठरविले आहे.

बंडखोरांच्या प्रचाराचा मुद्दा
लोकसभा व विधानसभा निवडणुकांच्या वेळी पक्षाचे काम करणाऱ्या कार्यकर्त्यांनाच पदे दिली जातील, असे श्री. अजित पवार यांनी स्पष्ट केले होते. विधानसभा निवडणुकीत महेश लांडगे यांनी भोसरी मतदारसंघातून बंडखोरी करून उभे राहिलेले विलास लांडे यांचे काम केल्याचा मुद्दा बहलसमर्थकांनी लावून धरला; तसेच दोन वर्षांनंतर महापालिकेची निवडणूक आहे. या पार्श्‍वभूमीवर उमेदवारी कोणाला दिली जाते, याबाबत कार्यकर्त्यांमध्ये उत्सुकता आहे. कार्यकर्ते आणि नगरसेवकांची मते जाणून घेतली जातील. मात्र, उमेदवाराचे नाव आपणच निश्‍चित करू, असे श्री. पवार यांनी नुकत्याच झालेल्या िंपपंरी-चिंचवड भेटीत स्पष्ट केले. त्यामुळे सर्वांचेच लक्ष गुरुवारच्या मेळाव्याकडे लागले आहे. शहराचे निरीक्षक रमेश शेंडगे आणि शहराध्यक्ष पानसरे यांच्या उपस्थितीत दुपारी चार वाजता रहाटणीतील हॉटेल विमल गार्डन येथे मेळावा होईल.