सकाळ न्यूज नेटवर्क

उत्तम कांबळे - सकाळ न्यूज नेटवर्क
वॉशिंग्टन - अमेरिकेने पाकिस्तानला कोणत्याही स्थितीत शस्त्रास्त्रांचा पुरवठा करू नये, असा आग्रह भारताच्या पंतप्रधानांनी अमेरिकेचे अध्यक्ष बराक ओबामा यांच्याकडे धरावा, अशी एक प्रबळ लोकभावना आज "व्हाइट हाउस'च्या परिसरात भेटलेल्या अनेक भारतीयांनी माध्यम प्रतिनिधींशी बोलताना व्यक्त केली.

"व्हाइट हाउस'च्या परिसरात सकाळी भारतातील प्रसारमाध्यमांच्या प्रतिनिधींनी फेरफटका मारला. रविवार असल्याने लोकांची प्रचंड गर्दी होती. शिखर परिषदेनिमित्त जगभरातील नेते येणार असले तरी सुरक्षा व्यवस्थेची झळ सर्वच सामान्य माणसांना बसणार नाही, याची काळजी प्रशासनाने घेतलेली दिसते. "व्हाइट हाउस'च्या समोरील भव्य उद्यानात जगभरातील
पर्यटकांची आणि अमेरिकास्थित नागरिकांची गर्दी होती. विशेष म्हणजे गेले दोन दिवस वाहणारे थंडीचे वारे एकाएकी थांबले होते आणि चक्क ऊ न पडले होते.

आंध्र प्रदेशातील एक ज्येष्ठ जोडपे आपली मुलगी, नात आणि जावयासोबत बागेत फिरत होते. गुजरातमधील एक तरुण जोडपे तसेच पश्‍चिम बंगालमधील एक कुटुंबही या ठिकाणी भेटले. मनमोहनसिंग आणि ओबामा यांच्या भेटीत नेमके काय होणार, याविषयी येथील भारतीयांना प्रचंड उत्सुकता आहे. या सर्व भारतीयांना बोलते केले. काहींनी तर कॅमेऱ्यासमोर येऊन प्रतिक्रिया दिल्या. प्रत्येकाच्या मनात एकच भावना होती आणि ती म्हणजे अमेरिकेने पाकिस्तानला कसलीही मदत देऊ नये. अमेरिकेकडून मिळालेली मदत पाकिस्तान भारताविरुद्ध वापरत आला आहे, हे सांगायलाही अमेरिकेतील भारतीय विसरले नाहीत. गेल्या काही दिवसांपासून अमेरिका आणि भारत यांच्यातील संबंध अधिक मैत्रीचे होत असल्याबद्दल त्यांनी आनंद व्यक्त केला.

पंतप्रधान मनमोहनसिंग यांनी आपला पूर्वनियोजित दौरा बदलून तो एक दिवस अगोदर सुरू केला. त्यामागेही एक कारण आहे. अध्यक्ष ओबामा यांनी आण्विक शिखर परिषदेपूर्वी जगातील सात-आठ राष्ट्रांच्या प्रमुखांशी स्वतंत्रपणे बोलण्याची इच्छा व्यक्त केली. त्यात भारतही आहे. परिषदेच्या वेळी द्विपक्षीय संबंधावर निवांतपणे बोलता येणार नाही, म्हणून ओबामा यांनी एक दिवस अगोदर येण्याचे निमंत्रण डॉ. मनमोहनसिंग यांना दिले.

अमेरिकेत प्रथमच होत असलेल्या आण्विक शिखर परिषदेकडे सर्व जगाचे लक्ष लागले आहे. या परिषदेच्या निमित्ताने जगात शांतता निर्माण करण्यासाठी कोणते पाऊल टाकले जाते याविषयी येथे उत्सुकता आहे.