वृत्तसंस्था

सिंगापूर - भारताची अव्वल खेळाडू साईना नेहवालने सिंगापूर खुल्या बॅडमिंटन स्पर्धेत विजेतेपद पटकावून पुन्हा एकदा आपली गुणवत्ता सिद्ध केली. जागतिक क्रमवारीत सहाव्या स्थानावर असलेल्या वीस वर्षांच्या या खेळाडूने दुसऱ्यांदा "सुपर सिरीज' स्पर्धा जिंकली आहे. तिने रविवारी ही कामगिरी करताना अंतिम सामन्यात तैवानच्या झु यिंग हिच्यावर 21-18, 21-15 असा सरळ विजय नोंदविला.

या स्पर्धेत प्रथम मानांकन असलेल्या साईनाने अवघ्या 33 मिनिटांत विजय मिळविला. सिंगापूर इनडोअर स्टेडियममध्ये झालेल्या अंतिम सामन्यात साईनाने निर्धारपूर्वक खेळ करताना आपल्या लौकिकाला साजेशी कामगिरी केली. तिचे हे दुसरे "सुपर सिरीज' विजेतेपद आहे. गेल्या वर्षी जूनमध्येच तिने इंडोनेशियन खुल्या बॅडमिंटन स्पर्धेत विजेतेपद पटकावले होते. या वेळी इतर सर्व भारतीय खेळाडूंचे आव्हान उपांत्य फेरीतच संपुष्टात आल्यानंतर सर्वांचे लक्ष साईनाकडे होते.
या यशामुळे आनंदित झालेली साईना म्हणाली, ""माझ्या मार्गात चीनच्या दोन सर्वोत्कृष्ट खेळाडू असल्याने अंतिम फेरीपर्यंत मजल जाईल, असे मला वाटले नव्हते; परंतु मी आत्मविश्‍वासपूर्वक खेळ केला आणि हे यश मिळविले.'' साईनाने गेल्याच आठवड्यात भारतीय ग्रांप्री स्पर्धा जिंकली होती. ""भारतीय ग्रांप्री स्पर्धेतील विजेतेपदामुळे माझा आत्मविश्‍वास वाढला. त्यामुळे मी अधिक चांगला खेळ करू शकले,'' असेही ती म्हणाली.

आजच्या अंतिम सामन्याची सुरवात चुरशीची झाली होती. एक वेळ साईना 8-14 अशी पिछाडीवर पडली होती; परंतु तिने जोरदार खेळ करीत 18-18 अशी बरोबरी साधली. तिने स्मॅशेसचा सुरेख खेळ केला. तिने सात गुण स्मॅशेसवर मिळविले आणि पहिल्या गेममध्ये बाजी मारली. दुसऱ्या गेममध्ये साईनाने नेटजवळून अधिक सरस खेळ करून विजय साकारला.

""सामन्याच्या सुरवातीला मी थोडी निराश झाले होते; परंतु रॅलीजवर भर देत मी खेळ केला आणि जसाजसा सामना पुढे सरकत गेला, तसतसा माझा आत्मविश्‍वास वाढला,'' असे सांगून साईना म्हणाली, ""पहिल्या गेममध्ये मी पिछाडीवर पडले होते, तेव्हा मी सर्वोत्कृष्ट खेळ करण्याचा निर्धार केला आणि त्यात मला यश आले.''

साईनाची प्रतिस्पर्धी झु यिंग ही पात्रता फेरीतून मुख्य स्पर्धेत दाखल झाली होती. तिने काही चांगल्या खेळाडूंना पराभूत करून अंतिम फेरीत प्रवेश केला होता. साईनालाही तिने थोडे अस्थिर केले होते. तिने काही फसवे फटके मारल्याने साईना अडचणीत आली होती. साईनाने तिच्या खेळाचा अभ्यास करून जिद्दीने खेळ करीत बाजी मारली.  

Follow
Us on
Twitter