पीटीआय

भारत 9 बाद 669, दुसरी कसोटी अनिर्णित अवस्थेकडे

कोलंबो  -  सचिन तेंडुलकरचे द्विशतक आणि सुरेश रैनाने पदार्पणाच्या कसोटीत झळकविलेल्या शतकाच्या जोरावर भारतीय संघाला दुसऱ्या क्रिकेट कसोटी सामन्यात श्रीलंकेची पहिल्या डावातील धावसंख्या मागे टाकता आली. अनिर्णित अवस्थेकडे झुकलेल्या या कसोटीत गुरुवारी चौथ्या दिवशी भारताने 9 बाद 669 असा धावांचा डोंगर उभारून पहिल्या डावात 27 धावांची आघाडी मिळविली.

आजच्या दिवसाचे हीरो होते, ते मास्टर ब्लास्टर तेंडुलकर आणि नवोदित रैना. या दोघांनी महत्त्वाच्या क्षणी मोठी भागीदारी करून टीम इंडियाला फॉलोऑनच्या नामुष्कीपासून सहजपणे वाचविले. त्यांच्या खेळामुळे श्रीलंकेची 4 बाद 642 घोषित, ही धावसंख्याही भारताला मागे टाकता आली.

सचिनने कसोटी कारकिर्दीतील पाचवे द्विशतक झळकविताना 37व्या वर्षीही दीर्घवेळ खेळण्याची आपली क्षमता आणि दर्जा किती जबरदस्त आहे, हे दाखवून दिले, रैनाने युवराजसिंगच्या जागी मिळालेल्या संधीचे सोने केले. या कसोटीचा आता एकच दिवस बाकी आहे आणि सिंहलीज स्पोर्टस मैदानाची खेळपट्टी अजूनही फलंदाजीसाठीच अनुकूल आहे. त्यामुळे ही कसोटी अनिर्णित राहणार, हे निश्‍चित आहे.

सचिनने आज एकाग्रता ही काय चीज असते, हे दाखवून दिले. त्याने रैनाबरोबर पाचव्या विकेटसाठी 256 धावांची विक्रमी भागीदारी करून भारताला सुस्थितीत नेले. कालच्या 4 बाद 382 धावांवरून या जोडीने आज खेळावयास सुरवात केली, तेव्हा भारताला फॉलोऑन वाचविण्यासाठी आणखी 61 धावांची आवश्‍यकता होती. सचिन आणि रैनाने ही कामगिरी अगदी सहजपणे पार करीत श्रीलंकेच्या गोलंदाजांवर वर्चस्व गाजविले. पदार्पणाच्या कसोटीत शतक नोंदविणाऱ्या भारतीय फलंदाजांच्या पंक्तीत जाऊन बसताना रैनाने श्रीलंकेच्या वेगवान आणि फिरकी माऱ्याचा समर्थपणे सामना केला. सचिन आणि रैनाची भागीदारी अजंता मेंडीसने संपवली, तेव्हा श्रीलंकेने सुटकेचा निःश्‍वास टाकला. मेंडीसला कव्हरच्या दिशेने चौकार मारल्यानंतर रैना बाद झाला. तो शॉर्ट मिडविकेटला संगकाराकडे सोपा झेल देऊन परतला. त्याने 120 धावांच्या खेळीत बारा वेळा चेंडू सीमापार केला, तर दोन षटकार ठोकले.

रैनाच्या जागी आलेला कर्णधार महेंद्रसिंह धोनीला स्थिरावण्यास फार वेळ लागला नाही. त्याने सूरज रणदिवला दोन लागोपाठ चौकार ठोकले. त्यानंतर त्याने मेंडीस आणि धम्मीका प्रसाद यांचाही समाचार घेतला. दुसऱ्या बाजूने सचिनचाही तडाखा सुरू होता. त्याने दिल्हारा फर्नांडोचा ताशी 147 किलोमीटर वेगाने आलेला चेंडू लीलया फटकावून आपला दर्जा दाखवून दिला. चहापानानंतर लगेचच तो बाद झाला. 347 चेंडूंत 23 चौकार आणि एक षटकाराच्या मदतीने 203 धावा करणारा हा चॅंपियन फलंदाज दिल्शानच्या गोलंदाजीवर यष्टीमागे झेलबाद झाला. दिल्शानने त्यापाठोपाठ हरभजनला परतविले. त्यानंतर धोनीने अभिमन्यू मिथुनच्या साथीत श्रीलंकेची धावसंख्या मागे टाकली.

धावफलक
श्रीलंका - पहिला डाव - 4 बाद 642, घोषित
भारत - पहिला डाव
मुरली विजय पायचीत गो. मेंडीस 58
वीरेंद्र सेहवाग यष्टीचीत प्रसन्ना जयवर्धने गो. रणदिव 99
राहुल द्रविड पायचीत गो. रणदिव 3
सचिन तेंडुलकर झे. प्रसन्ना जयवर्धने गो. दिल्शान 203  (516 मिनिटे, 323 चेंडू, 23 चौकार, एक षटकार)
व्ही. व्ही. एस. लक्ष्मण पायचीत गो. मेंडीस 29
सुरेश रैना झे. संगकारा गो. मेंडीस 120 (294 मिनिटे, 228 चेंडू, 12 चौकार, दोन षटकार)
महेंद्रसिंह धोनी झे. व गो. दिल्शान 76  (164 मिनिटे, 138 चेंडू, सात चौकार)
हरभजनसिंग झे. संगकारा गो. दिल्शान 0
अभिमन्यू मिथुन त्रि. गो. मेंडीस 41 (109 मिनिटे, 97 चेंडू, सात चौकार)
इशांत शर्मा खेळत आहे 10
प्रग्यान ओझा खेळत आहे 0
अवांतर 30
एकूण 198 षटकांत 9 बाद 669
बाद क्रम - 1-165, 2-169, 3-173, 4-241, 5-497, 6-592, 7-592, 8-643, 9-668

गोलंदाजी
धम्मीका प्रसाद 19-1-96-0
दिल्हारा फर्नांडो 31-1-116-0
एंजलो मॅथ्यूज 9-1-24-0
रणदिव 64-14-212-2
अजंता मेंडीस 54-7-157-4
दिल्शान 21-4-50-3