शेगावात दिवाळीपूर्वीच दिवाळी!
सकाळ वृत्तसेवा
Saturday, September 04, 2010 AT 12:15 AM (IST)
शेगाव (जि. बुलडाणा) - "सर्वे भवन्तू सुखिन:' हे ब्रिदवाक्य अंगीकारून विदर्भाच्या पंढरीत संत गजानन महाराजांचा समाधी शताब्दी सोहळा काही दिवसांवर येऊन ठेपला आहे. 24 ऑगस्ट रोजी मंदिरात सुवर्ण ध्वज उभारून या सोहळ्याला सुरवात झाली. त्यांनतर महोत्सवाची तयारी जोमात सुरू झाली. वर्षभरात 24 ऑगस्ट 2009 पासून आतापर्यंत समाधी शताब्दी सोहळ्याच्या निमित्ताने 36 लाख भाविकांनी "श्रीं'च्या चरणी माथा टेकविला. 12 सप्टेंबर या दिवशीच्या मुख्य सोहळ्यापर्यंत 50 लाखांवर भाविकांनी शेगावात हजेरी लागणार असून हा विदर्भातील गर्दीचा विक्रम ठरण्याची शक्यता आहे.
नऊ ते 12 सप्टेंबर दरम्यान मुख्य सोहळा होणार असून त्यासाठी कर्मयोगी शिवशंकर पाटील यांच्या मार्गदर्शनाखाली मंदिराच्या जिर्णोद्धाराचे व कामे पूर्ण झाली आहेत. गेल्या आठ दिवसांपासून शेगावातील नागरिकांनीही आपआपल्या घराची रंगरंगोटी करून हा उत्सव आपल्यासाठी केवळ उत्सव नसून दिवाळसण असल्याचे सांगितले. त्यामुळे मंदिराबरोबर प्रशासनाची तयारी विशेष असताना शहरात जिकडे तिकडे कमालीचे चैतन्य पसरलेले आहे.
शाळांना दहा दिवस सुटी
दिवाळी, ख्रिसमस म्हटला की, शाळांना सुटी असते. परंतु शेगावच्या इतिहासात प्रथमच दिवाळी, उन्हाळ्याच्या सुटीनंतर दहा दिवस शाळांना सुटी राहणार आहे. उत्सवादरम्यान नगरपालिकेच्या शाळा, कॉलेज बंद राहतील. भाविकांची गैरसोय होऊ नये म्हणून शाळांचा निवास व्यवस्था म्हणून उपयोग करण्यात येणार आहे. "श्रीं'च्या समाधी सोहळ्याच्या निमित्ताने दिवाळीपूर्वीच दिवाळीसणाचा आनंद नागरिक घेत आहेत.
- शताब्दी उत्सवात रोज येणार तीन लाख भाविक
- आरोग्य सेवेसाठी 1300 खाटांची व्यवस्था
- एक हजार बॉटल रक्त उपलब्ध
- तीन हजार वाहनांसाठी वाहनतळ
- परिक्रमा मार्गावर मोबाईल टॉयलेट
- आनंदविसावा परीसरात होणार महाप्रसाद वाटप
- गणेश मूर्तींसाठी विशेष जागा
- स्थानिक वाहनांना बंदी नाही
- शांतता समिती सदस्य, पत्रकारांना विशेष ओळखपत्र
- आठ ते 12 सप्टेंबरपर्यंत ऑटोरीक्षा बंद
- दर्शनासाठी मुखदर्शन, कळसदर्शन, समाधीदर्शन असे तीन प्रकार