- सकाळ वृत्तसेवा

सातारा - "गाडी नोंदवली आणि लघुशंकेला जाण्यासाठी वळलो. काही पावले पुढे गेल्यावर समोर माझीच एसटी बस जाताना दिसली. गाडीच्या मागे पळालो; पण थांबवता आली नाही. कोण काय करतंय हेच कळत नव्हते...' सातारा-पुणे विनाथांबा गाडी घेऊन स्वारगेटला गेलेले चालक संतोष जनार्दन हेंद्रे (वय 38, सातारा) हतबल होऊन सांगत होते.

पुण्यात माथेफिरू एसटी चालकाने नऊ जणांचे बळी घेतले. त्याचे नाव संतोष मारुती माने. त्याने जी एसटी बस पळवली, तिच्या चालकाचेही नाव "संतोष'च आहे. सातारा आगाराच्या या एसटीचालकाने आज सकाळी स्वारगेटवर घडलेल्या प्रकाराची "सकाळ'ला माहिती दिली.

त्यांनी सांगितले, ""सकाळी सहा वाजता साताऱ्यातून सुटणारी सातारा-स्वारगेट विनाथांबा गाडी (एमएच 14 बीटी 1532) घेऊन आठ वाजण्याच्या सुमारास स्वारगेटला पोचलो. माझ्यासमोर प्लॅटफॉर्मवर दुसरी गाडी उभी होती. त्यामध्ये प्रवासी बसत होते. त्यामुळे मी गाडी मागेच उभी केली. माझ्या गाडीतील सर्व प्रवासी उतरून गेले. प्रवासी दार लॉक केले. गाडीचे हॅंडब्रेक लावले आणि चावी काढून घेतली. खाली उतरून केबिनमध्ये "पहिली गाडी सुटली की माझ्या गाडीचे बुकिंग सुरू करा,' असे सांगितले. मग लघुशंकेसाठी निघालो. काही पावले पुढे गेल्यानंतर माझीच गाडी धावताना दिसली. प्रथम कोण काय करतंय कळलेच नाही. जीवाच्या आकांताने "धरा...धरा...' असे ओरडत गाडीच्या मागे पळत सुटलो. माझ्याबरोबर काही हमालही गाडी थांबविण्यासाठी पळत होते. चालकाने गाडी आगाराबाहेर काढली तेच दोघा-चौघांना ठोकर देत. नंतर परत दुसऱ्या गेटने गाडी आत घेतली. पुन्हा "आउट गेट'मधून बाहेर काढून सेव्हन लव चौकाकडे वळविली.''

""काय करावे काही सुचेना म्हणून साताऱ्याला एसटीचे अधिकारी शेखर चव्हाण यांना फोन करून घटना सांगितली. त्यांनी जवळच्या पोलिस चौकीत तक्रार करायला सांगितले. त्यानुसार सिग्नलजवळील पोलिस चौकीत जाऊन घटनेची वर्दी दिली,'' असेही हेंद्रे यांनी सांगितले.

हेंद्रे हे 2005 मध्ये चालक म्हणून भरती झाले. ते मूळचे बेलसर (जेजुरी) येथील आहेत. त्यांची पत्नी सातारा पोलिस मुख्यालयात पोलिस शिपाई आहे. दोघेही मल्हार पेठेत मुख्यालयाच्या कर्मचारी वसाहतीत राहतात.