वॉशिंग्टन - अमेरिकेने केलेल्या चुकांमुळे जगभरातील अनेक नागरिकांना प्राण गमवावा लागल्याची भावना अमेरिकेचे राष्ट्राध्यक्ष डोनाल्ड ट्रम्प यांनी व्यक्त केली आहे. रशियाचे राष्ट्राध्यक्ष व्लादिमीर पुतीन हे "मारेकरी' असल्याची भूमिका ट्रम्प यांच्यापुढे यावेळी मांडण्यात आली. मात्र पुतीन यांच्यासंदर्भात बोलताना ट्रम्प यांनी अमेरिकाही पूर्णत: निर्दोष नसल्याचे प्रतिपादन केले.
"अमेरिकेच्या धोरणांकडेही या दृष्टिकोनामधून पहावयास पाहिजे. मी पहिल्यापासूनच इराकमध्ये अमेरिकेने केलेल्या युद्धाविरोधात होतो. अमेरिकेकडूनही अनेक चुका झाल्या. त्यांमुळे अनेक जण मृत्युमुखी पडले. तेव्हा जगात अनेक मारेकरी आहेत. आपला देश हा पूर्णत: निष्पाप आहे, असे तुम्हाला वाटते की काय?,'' असे ट्रम्प म्हणाले. इस्लामिक स्टेट (इसिस) या जागतिक दहशतवादी संघटनेविरुद्धच्या लढाईमध्ये रशियाबरोबर सहकार्य करण्याची इच्छा ट्रम्प यांनी यावेळी व्यक्त केली.
दरम्यान, ट्रम्प यांच्या राजकीय विरोधकांनी त्यांनी अमेरिकेची रशियाबरोबर तुलना केल्याने टीकास्त्र सोडले आहे. ""रशियासारख्या हुकूमशाही, हिंसक राजवटीबरोबर अमेरिकेची तुलना करण्यात आलेली तुलना ही सर्वथा अयोग्य व निषेधार्ह आहे. राष्ट्राध्यक्षांच्या या धोकादायक धोरणास विरोध दर्शविणे ही अमेरिकेमधील सर्व लोकप्रतिनिधींची जबाबदारी आहे,'' अशी प्रातिनिधिक प्रतिक्रिया सिनेटर बेन कार्डिन यांनी या पार्श्वभूमीवर व्यक्त केली आहे.
|