"जी 20' मध्ये "मोदी-शी' चर्चा होणार नाही: चीन

नवी दिल्ली - भारत व चीनमध्ये सध्या असलेल्या तणावपूर्ण वातावरणाच्या पार्श्‍वभूमीवर जर्मनीत लवकरच होणाऱ्या जी-20 परिषदेमध्ये चिनी राष्ट्राध्यक्ष शी जिनपिंग व भारतीय पंतप्रधान नरेंद्र मोदी यांच्यात चर्चा होणार नाही, असे चीनकडून आज (गुरुवार) स्पष्ट करण्यात आले. शी-मोदी भेटीसाठी "चांगले वातावरण' नसल्याचे मत चिनी परराष्ट्र मंत्रालयामधील एका वरिष्ठ अधिकाऱ्याने व्यक्त केली आहे.

भारत-भूतान व चीन या देशांच्या सीमारेषा एकत्र येत असलेल्या (ट्रायजंक्‍शन) ठिकाणी भारतीय लष्कर व चिनी सैन्य एकमेकांसमोर उभे ठाकल्यामुळे गेल्या काही दिवसांपासून द्विपक्षीय संबंधांत मोठा तणाव निर्माण झाला आहे. या तणावाच्या पार्श्‍वभूमीवर मोदी व शी यांच्यामध्ये चर्चा होईल, असा अंदाज व्यक्त करण्यात आला होता. मात्र चीनकडून व्यक्त करण्यात आलेल्या या भूमिकेमुळे या अंदाजास पूर्णविराम मिळाला आहे.