वाहतूक पोलिसांना कंबरदुखी, गुडघेदुखी, फ्रोज शोल्डरचा त्रास

जळगाव : जळगाव शहरात वाहतूक नियंत्रित करण्याची जबाबदारी असलेल्या शहर वाहतूक शाखेतील कर्मचारी सतत उभे राहून ड्युटी करतात. सतत उभे राहिल्याने कंबरदुखी, गुडघेदुखी, मान दुखणे, सायटिका, चक्कर येणे, फ्रोजन शोल्डर, हातापायाला मुंग्या येणे, कामावरून घरी गेल्यावर डोके, पाय सुन्न होणे आदी व्याधींनी ग्रासले आहे.

ग्राहक पंचायतीच्या जळगाव तालुका शाखेतर्फे वाहतूक व सायबर पोलिसांसाठी वाहतूक शाखेच्या कार्यालयात आरोग्य तपासणी शिबिराचे आयोजन करण्यात आले. त्यात ४६ जणांची तपासणी करून त्यांच्या आजाराचे निदान व ॲक्युप्रेशरद्वारे उपचार करण्यात आले. या शिबिरात वाहतूक शाखेच्या ६९ मनुष्यबळापैकी ३६ व सायबर शाखेच्या १० अशा एकूण ४६ कर्मचाऱ्यांची तपासणी करण्यात आली. वाहतूक शाखेचे निरीक्षक लीलाधर कानडे, उपनिरीक्षक कैलासिंग पाटील, ग्राहक पंचायतचे जिल्हा उपाध्यक्ष डॉ. अविनाश सोनगीरकर, तालुका उपाध्यक्ष राजेंद्र गांगुर्डे, सचिव गिरिधर डाभी, सहसचिव डॉ. नितीन धांडे उपस्थित होते. वाहतूक शाखेच्या ६९ कर्मचाऱ्यांपैकी अवघ्या ३६ जणांची तपासणी झाली. हे सर्वच विविध शारीरिक व्याधींनी त्रस्त असल्याचे तपासणीत दिसून आले.

दोन महिने उपचाराचा सल्ला

शिबिरात व्याधी निदान झाल्यानंतर व्यायाम तसेच मशिनद्वारे २० मिनिटे ॲक्युप्रेशर उपचार करण्यात आले. त्यामुळे त्यांना तात्पुरता आराम मिळाला असला तरी काही जणांना किमान दीड ते दोन महिने सातत्याने उपचार घेण्याची गरज असल्याचे सांगण्यात आले.