अनिल परब यांच्याशी सबंधित ७ ठिकाणी आज इडीच्या अधिकाऱ्यांकडून चौकशी

दाभोळ : केंद्रींय पर्यावरण मंत्रालयाच्या कारवाईनंतर दापोली तालुक्यातील मुरुड येथील बहुचर्चित साई रिसाँर्टमध्ये इडीचे अधिकारी चौकशीसाठी आज सकाळी ६.३० वाजता दाखल झाले असून दुपारपर्यंत ३ अधिकाऱ्यांकडून हि चौकशी सुरु होती. राज्याचे परिवहन मंत्री व रत्नागिरीचे पालकमंत्री अनिल परब यांच्याशी सबंधित ७ ठिकाणी आज इडीच्या अधिकाऱ्यांकडून चौकशी केली जात असून याच कारवाईचा एक भाग म्हणून इडीच्या मुंबई येथील कार्यालयातील ३ अधिकारी मुरुड येथील साई रिसाँर्ट येथे आज सकाळी ६.३० वाजता दाखल झाले आहेत.

विभास साठे यांचेकडून अनिल परब यांनी दापोली तालुक्यातील मुरुड समुद्रकिनार्याला लागून असलेली जागा खरेदी केली होती, काही दिवसांनी अनिल परब यांनी हि जागा त्यांचे निकटवर्तीय व माजी मंत्री रामदास कदम यांचे बंधू सदानंद कदम यांनी विकली होती, त्यावर सदानंद कदम यांनी अलिशान असे साई रिसाँर्ट बांधले आहे. हे रिसाँर्ट बांधताना सीआरझेड कायद्याचा भंग करण्यात आल्याची तक्रार भाजपचे नेते व माजी खासदार किरीट सोमय्या यांनी केंद्रीय वन, पर्यावरण मंत्रालयाकडे केली होती या तक्रारीनुसार पर्यावरण मंत्रालयाच्या अधिकार्यांनी मुरुड येथे येवून पाहणी केली होती व पर्यावरण मंत्रालयाला अहवाल सदर केला होता त्यानुसार पर्यावरण कायद्याचा भंग करून बांधण्यात आलेले हे साई रिसाँर्ट तोडून टाकावे असे आदेश पर्यावरण मंत्रालयाने दिले होते तसेच दापोली न्यायालयात या संदर्भात एक खटलाही दाखल केला आहे.

परिवहन मंत्री अनिल परब यांनी मुरुड येथील हि जागा उद्योजक सदानंद कदम यांना विकलेली असली तरी त्यात अनिल परब यांचे हितसंबंध असल्याचे आरोप किरीट सोमय्या यांनी वारंवार केले आहेत. मध्यंतरी आयकर विभागाने केलेल्या चौकशीत साई रिसाँर्ट बांधण्यासाठी केलेल्या खर्चाबाबतही माहिती घेतली होती, त्यानंतर आज मंत्री अनिल परब यांचेशी संबंधित ठिकाणी इडीच्या अधिकार्यांनी छापे मारले आहे.

मुरुड येथे इडीचे ३ अधिकारी मुंबई येथून आज सकाळी ६.३० वाजता साई रिसाँर्ट येथे दाखल झाले असून त्यांनी चौकशी सुरु केली आहे. मात्र साई रिसाँर्ट मुरुड येथे कोणताही पोलीस बंदोबस्त आढळून आला नाही.आज सकाळी ६.३० वाजताच या चौकशीला सुरवात झाली असल्याने मुरुड येथील अनेकांना अधिकारी चौकशीला आले असल्याची माहितीच नव्हती. इडीच्या या कारवाईने दापोली तालुक्यात खळबळ उडाली आहे.