कुस्तीपटू अंशू मलिकने रचला इतिहास; भारताला मिळालं रौप्यपदक

ओस्लो (नॉर्वे): येथे सुरू असलेल्या जागतिक कुस्ती अजिंक्यपद स्पर्धेत भारताची कन्या अंशू मलिक हिने इतिहास रचला. Wrestling World Championships मध्ये अंशू मलिकने रौप्यपदकाची कमाई केली. जागतिक कुस्ती अजिंक्यपद स्पर्धेत रौप्य पदकाची कमाई करणारी अंशू पहिली भारतीय कुस्तीपटू ठरली. युरोपच्या सोलोमिया विनिकला पराभूत करून अंशूने स्पर्धेच्या फायनल्समध्ये प्रवेश केला होता. आजच्या सामन्यात अंशूने अमेरिकेच्या हेलन मारोलिसशी दोन हात केले. पण तिला रौप्यपदकावर समाधान मानावे लागले. हेलन मारोलिसने ५७ किलो वजनी गटात विश्वविजेतेपद पटकावले.

त्यासोबतच, ५९ किलो वजनी गटात भारताच्या सरिता मोर हिनेही कांस्यपदकाची कमाई केली. सरिताला सेमीफायनलमध्ये हार पत्करावी लागली होती. त्यामुळे तिने आज कांस्यपदकाच्या लढतीत सहभाग घेत सामना जिंकला. तिने स्वीडनच्या कुस्तीपटूला ८-२ असे पराभूत केले.