थायलंड बॅडमिंटन स्पर्धेत सिंधूची उपांत्य फेरीत धडक

बॅंकॉक (थायलंड) : भारताच्या पी. व्ही. सिंधू हिने अपेक्षित कामगिरी करताना थायलंड ओपन बॅडमिंटन स्पर्धेच्या उपांत्य फेरीत धडक मारली. सिंधूने शुक्रवारी मलेशियाच्या सोनिया छेह हिचा 21-17, 21-13 असा पराभव केला.

द्वितीय मानांकित सिंधूने सातत्यपूर्ण कामगिरी करताना छेह हिच्यावर 36 मिनिटांत विजय मिळविला. उपांत्य फेरीत तिची गाठ आता इंडोनेशियाच्या ग्रेगोरिया मरिस्का हिच्याशी पडणार आहे.
सिंधूचा विजय सहज दिसत असला, तरी या लढतीत दोन्ही खेळाडू आपल्या स्ट्रोक्‍सचा टप्पा खोलवर राखण्यात अपयशी ठरत होत्या. विशेष करून सिंधू यामुळे अनेकदा अडचणीत आल्याची दिसत होती. त्यामुळेच एक वेळ सोनिया 7-11 अशी आघाडीवर होती. गेमच्या उत्तरार्धात सिंधूने संयमाने खेळ करून लढतीवर नियंत्रण मिळविले. सलग पाच गुण मिळवत तिने 13-12 अशी आघाडी मिळवली. सोनिया लांबवर स्ट्रोक्‍स खेळत होती, तेव्हा सिंधूने सलग चार गुणांची कमाई करत आपल्या आक्रमकतेने तिच्यावर दडपण आणले. खोलवर स्मॅशने गुण मिळवत सिंधूने पहिला गेम जिंकला.

दुसऱ्या गेमला सिंधूने 6-3 अशी आघाडी घेतली. या वेळी सोनियाने जोरदार प्रत्युत्तर देत 8-8 अशी बरोबरी साधली. त्यानंतर दोघींकडून सातत्याने चुका झाल्या. यात सिंधूने अनुभव पणाला लावत 11-9 अशी आघाडी कामय राखली. अखेरच्या टप्प्यातही सोनियाने जोरादर प्रतिकार करताना तीन मॅच पॉइंट वाचविले. अशा वेळी सिंधूने पुन्हा एकदा खोलवर स्मॅशने विजयावर शिक्कामोर्तब केले.