कोहली पाठोपाठ शास्त्री गुरुजींनी दिले कोच पदावरुन हटण्याचे संकेत

टी-20 वर्ल्ड कप स्पर्धेनंतर विराट कोहलीने टी-20 संघाचे नेतृत्व सोडण्याचा निर्णय घेतला. त्यापाठोपाठ आता संघाचे मुख्य प्रशिक्षक रवी शास्त्री यांनी देखील राजीनामा देणार असल्याचे संकेत दिले आहेत. इंग्लिश दैनिकाला दिलेल्या खास मुलाखतीमध्ये त्यांनी अनेक गोष्टीवर भाष्य केले. त्यावेळी त्यांनी कार्यकाळ पूर्ण झाल्यानंतर पुन्हा संघासोबत राहण्यासाठी कोणतीही धडपड करणार नाही, असे अप्रत्यक्षरित्या सांगितले. 2017 मध्ये चॅम्पियन्स ट्रॉफी स्पर्धेनंतर रवी शास्त्रींची भारतीय संघाच्या मुख्य प्रशिक्षकपदी नियुक्ती झाली होती.

द गार्डियनला दिलेल्या मुलाखतीमध्ये शास्त्री म्हणाले की, टीम इंडियाने पाच वर्ष कसोटी क्रमवारीत अव्वलस्थान राखले. ऑस्ट्रेलियात जाऊन दोन वेळा विजय मिळवला . इंग्लंडमध्ये इंग्लंडला पराभूत करुन दाखवले. टीम इंडियाची कामगिरी सर्वोत्तम अशीच आहे. कोरोना काळात टीम इंडियाने ऑस्ट्रेलियात मालिका जिंकली. इंग्लंडविरुद्धच्या कसोटी मालिकेत भारतीय संघाने 2-1 अशी आघाडी घेतली होती. लॉड्स आणि ओव्हलमधील कामगिरी सर्वोत्तम होती, असेही रवी शास्त्री यावेळी म्हणाले.

ते पुढे म्हणाले, मर्यादित षटकांच्या मालिकेत टीम इंडियाने सर्वच देशांना त्यांच्या घरात जाऊन पराभूत करुन दाखवले. जर आम्ही टी-20 वर्ल्ड कप जिंकला तर तो क्षण आमच्यासाठी सोन्याहून पिवळा क्षण असेल. कोरोना काळात ऑस्ट्रेलियाला पराभूत करणे आणि इंग्लंडला बॅकफूटवर ढकलणे ही माझ्यासाठी 4 दशकातील समाधानकारक कामगिरी आहे.

आगामी टी-20 वर्ल्ड कप भारतीय संघाचे मुख्य प्रशिक्षक म्हणून अखेरचा असेल का? असा प्रश्न रवी शास्त्री यांना विचारण्यात आला होता. या प्रश्नाचे उत्तर देताना शास्त्री म्हणाले की, हो मलाही तेच वाटते. जे साध्य करायचे होते ते साध्य झाले आहे. माझ्या मार्गदर्शनाखाली संघाने केलेल्या कामगिरीवर समाधानी आहे. क्रिकेटमधील 4 दशकातील माझ्यासाठी सर्वोत्तम काळ होता, असे म्हणत त्यांनी टी-20 वर्ल्ड कप स्पर्धा शेवटची असेल, असे संकेत दिले.