सुशीलची ‘दुखापती’मुळे माघार

मुंबई - दोन ऑलिंपिक पदके जिंकणारा मल्ल सुशीलकुमारच्या आंतरराष्ट्रीय पुनरागमनाला दुखापतीचा ब्रेक लागला आहे. आशियाई विजेतेपद स्पर्धा तोंडावर आलेली असताना सुशीलने गुडघा दुखापतीचे कारण देत माघार घेतली. आशिया पात्रता स्पर्धेसाठी त्याने हरविलेल्या आणि त्याच्याबरोबरच वाद झालेला प्रवीण राणाच आता या आशियाई विजेतेपद स्पर्धेत जाणार आहे. ही स्पर्धा कझाकिस्तान येथे २७ फेब्रुवारी ते ४ मार्च या दरम्यान होत आहे.

ऑलिंपिक पदकानंतर सुशीलकुमार आखाड्याच्या बाहेरच अधिक गाजला आहे. रिओ ऑलिंपिकसाठी नरसिंग यादव पात्र ठरल्यानंतर वाद गाजू लागले आहेत. राष्ट्रीय अजिंक्‍यपद स्पर्धेत अखेरच्या तीन लढतीत प्रतिस्पर्ध्यांनी घेतलेली माघार आणि यामध्ये समावेश असलेल्या प्रवीण राणाने उभे केलेले आव्हान; तसेच पोलिसांत केलेली तक्रार यामुळे सुशीलकुमार चर्चेत राहिला आहे. 

आगामी राष्ट्रकुल स्पर्धा आणि त्यानंतरची आशियाई स्पर्धा यावर सुशीलने लक्ष केंद्रित केले आहे. त्यासाठी राणाविरुद्धची पात्रता लढत त्याने जिंकली होती; परंतु त्या लढतीत सुशीलकुमारच्या समर्थकांनी आपल्याला मारहाण केल्याची आणि जिवे मारण्याची धमकी दिल्याची पोलिसात तक्रार केली होती. त्यानंतर झालेल्या कुस्ती लीगमध्ये सुशीलने माघार घेतली होती. पात्रता सामन्यातच आपला गुडघा दुखावला होता, त्यातून अजून तंदुरुस्त झालो नसल्याचे सुशीलने सांगितले आहे.

कुस्ती लीग संपल्यानंतर राणाच्या तक्रारीवर चौकशी सुरू होणार होती; तसेच कुस्ती महासंघानेही सुशीलला नोटीस दिलेली आहे. या सर्व पार्श्‍वभूमीवर सुशीलने दुखापतीचे कारण देत माघार घेतली असावी, अशी चर्चा भारतीय कुस्ती वर्तुळात सुरू आहे. आशियाई अजिंक्‍यपद स्पर्धा नव्या गटानुसार आणि दोन दिवसांची (दुसऱ्या दिवशी पदकांच्या लढती) होणार आहे. या बदलत्या रचनेसाठीही सुशील अजून मानसिकदृष्ट्या तयार नसावा, अशीही चर्चा आहे.