विधान परिषदेचे चित्र आज स्पष्ट होणार

सहा जागांसाठी 54 अर्ज वैध; अपक्षांचा सर्वाधिक भरणा
मुंबई - स्थानिक स्वराज्य संस्था प्राधिकारी मतदारसंघातून विधान परिषदेवर निवडून द्यायच्या सहा जागांच्या निवडणुकीचे चित्र उद्या (शनिवार) स्पष्ट होईल. पाच नोव्हेंबरला अर्ज माघारीची मुदत संपत आहे. या मुदतीत कॉंग्रेस आघाडीत समझोता होणार की नाही, याकडे दोन्ही कॉंग्रेसच्या कार्यकर्त्यांचे लक्ष लागले आहे.

उमेदवारी अर्जाच्या छाननीनंतर एकूण 54 अर्ज वैध ठरले आहेत. उमेदवारांमध्ये अपक्ष उमेदवारांचा भरणा अधिक आहे. एकट्या जळगावमध्ये 24 उमेदवार अपक्ष म्हणून निवडणूक रिंगणात उतरले आहेत. अर्ज माघारीच्या वेळी अनेक अपक्ष उमेदवार अर्ज मागे घेण्याची शक्‍यता आहे. त्यामुळे माघारीनंतरच निवडणुकीचे खरे चित्र स्पष्ट होईल.

विधान परिषदेच्या पुणे, सांगली-सातारा, यवतमाळ, भंडारा-गोंदिया, जळगाव आणि नांदेड या सहा स्थानिक स्वराज्य संस्था मतदारसंघांतील निवडणुकीच्या निमित्ताने दोन्ही कॉंग्रेस आणि सत्ताधारी शिवसेना-भाजपमध्ये बेबनाव झाला आहे. कॉंग्रेसने निवडणूक होऊ घातलेल्या सर्वच ठिकाणी अधिकृत उमेदवार उभे केले आहेत. राष्ट्रवादी कॉंग्रेसने नांदेड आणि यवतमाळ वगळता इतर चार मतदारसंघांत पक्षाचे उमेदवार रिंगणात उतरवले आहेत. यवतमाळमध्ये विद्यमान आमदार संदीप बाजोरिया हे अपक्ष म्हणून निवडणूक लढत आहेत, तर नांदेडमध्ये राष्ट्रवादीने अपक्ष उमेदवार श्‍यामसुंदर शिंदे यांना पाठिंबा जाहीर केला आहे. पुणे स्थानिक स्वराज्य संस्था मतदारसंघात भाजपच्या अशोक येनपुरे आणि शिवसेनेच्या ज्ञानेश्‍वर खंडागळे असे दोघांचे अर्ज आहेत. याशिवाय राष्ट्रवादीचे माजी आमदार विलास लांडे यांनी अपक्ष म्हणून अर्ज भरला आहे.