बारावी विज्ञान शाखेचे विद्यार्थी दहा गुण गमावणार

राज्यात सध्या बारावीची परीक्षा सुरू आहे. बारावीची परीक्षा ही विद्यार्थ्यांसाठी अनन्यसाधारण असते. विद्यार्थी बारावीच्या परीक्षेसाठी वर्षभर मेहनत घेतात. या परीक्षेत मिळणारे एकूण एक गुण खुप महत्त्वाचा असतो. अशात बारावीच्या विद्यार्थ्यासाठी धक्कादायक बातमी आहे. एका एका गुणांसाठी धडपडणाऱ्या बारावी सायन्स शाखेच्या विद्यार्थ्यांना जीवशास्त्रातील बहुपर्यायी प्रश्नांसाठी असलेले 10 गुण आता गमवावे लागण्याची शक्यता आहे. याबाबत महाविद्यालयांना सूचना देण्याच आल्याचे बोलले जात आहे. गुणांबाबतचा निर्णय आता नियामकाना देण्यात आल्याने विद्यार्थ्यांसमोर मोठा प्रश्न आहे.

जीवशास्त्राच्या परीक्षेत पहिल्या प्रश्नात 10 गुणांचे बहुपर्यायी प्रश्न विचारण्यात येतात. या प्रश्नाचे उत्तर लिहिताना विद्यार्थ्यांना केवळ पर्याय लिहिला असल्यास अथवा फक्त उत्तर असल्यास शून्य गुण देण्याच्या सूचना परीक्षक आणि नियामकांना देण्यात आल्या आहेत. पूर्ण वाक्यात उत्तर लिहून त्यात पर्याय लिहिल्यास तरच गुण मिळणार आहे.

दोन वर्षाच्या कोरोना काळानंतर विद्यार्थी या वर्षी ऑफलाईन परीक्षा देत आहे. अशातच या निर्णयाने पेपर तपासणी कठोर दिसत आहे. यावरुन आता बारावीच्या विद्यार्थ्यांमध्ये चिंतेचे वातावरण आहे.