पसंतीच्या रुग्णालयातच भुजबळांवर ऍन्जिओग्राफी

"जेजे'चे अधिष्ठाता डॉ. लहाने यांची माहिती

मुंबई :  तुरुंगात असलेले राष्ट्रवादी कॉंग्रेसचे नेते छगन भुजबळ यांनी जे. जे. रुग्णालयात ऍन्जिओग्राफी करण्यास नकार दिला आहे. त्यांच्या पसंतीच्या रुग्णालयात ऍन्जिओग्राफी करण्याची त्यांची इच्छा असल्याचे रुग्णालयाचे अधिष्ठाता डॉ. तात्याराव लहाने यांनी सांगितले. भुजबळ यांना ऑर्थर रोड तुरुंगात तूर्तास हलवणार नसल्याचे त्यांनी सांगितले.
हृदयाचे ठोके अनियमित असल्यामुळे भुजबळांना ऑक्‍टोबरच्या शेवटच्या आठवड्यात ऑर्थर रोड तुरुंगातून जे. जे. रुग्णालयात हलवण्यात आले होते.

यापूर्वीही अनेकदा भुजबळांना याच तक्रारीसाठी रुग्णालयात नेण्यात आले होते. जे. जे. रुग्णालयातील डॉक्‍टरांनी तपासण्याही केल्या. त्यासाठी सुमारे 20 दिवस भुजबळ खासगी बॉम्बे हॉस्पिटलमध्ये दाखल होते. तेथील हृदयरोगतज्ज्ञ डॉ. बी. के. गोयल यांनी त्यांच्यावर ऍन्जिओग्राफी करण्याची आवश्‍यकता असल्याचे 27 नोव्हेंबरलाच तुरुंग प्रशासनाला कळवले आहे. भुजबळ यांना 7 डिसेंबरला जे. जे. रुग्णालयात नेण्यात आले. तिथे पाच दिवस उलटल्यानंतर त्यांनी ऍन्जिओग्राफी करण्यास नकार दिला. भुजबळ सांगतील त्या रुग्णालयात ऍन्जिओग्राफी करण्यात येईल, असे डॉ. लहाने म्हणाले.