भाजप-मनसेची युती कधी होणार?, फडणवीस म्हणतात...

मुंबई : सध्या राज ठाकरे आपल्या सभांमधून भाजपचे (BJP) कौतुक करताना दिसत आहेत. त्यांनी उत्तर प्रदेशचे मुख्यमंत्री योगी आदित्यनाथ यांचे देखील कौतुक केले होते. त्यानंतर मनसे आणि भाजप युतीच्या चर्चांनी आणखीच जोर धरला. मनसे आणि भाजपची (MNS BJP Alliance) युती कधी होणार? असा प्रश्न आज देवेंद्र फडणवीसांना (Devendra Fadnavis) विचारण्यात आला.

मनसे आणि युतीच्या बातम्या परसविण्यात आल्या आहेत. या बातम्या कपोलकल्पित आहेत. आमची कुठलीही अधिकृत चर्चा झालेली नाही. कोणताही प्रस्ताव नाही. अलिकडच्या काळात राज ठाकरेंनी घेतलेल्या भूमिका भाजपच्या देखील भूमिका आहेत. आम्ही ज्या भूमिका मांडतो त्याच भूमिका राज ठाकरे मांडत आहेत, असं देवेंद्र फडणवीस म्हणाले.

इंधनदरवाढीवरून सरकारवर टीका -

राज्य सरकारचा दृष्टीकोण अतिशय लघू आहे. केंद्रीय पेट्रोलियम मंत्र्यांनी या सरकारला उघडं पाडलं आहे. सरकारने १ लाख २० हजार रुपये इंधन दरावरील कर कमावला. दर कमी करण्याची वेळ आल्यानंतर वेगवेगळे बहाणे केले जात आहेत. देशातील भाजपशासित सर्व राज्यांनी पेट्रोल-डिझेलचे दर कमी केले आहेत. गुजरातमध्ये १५ रुपयांनी दर कमी आहेत, असा निशाणा फडणवीसांनी महाविकास आघाडी सरकारवर साधला आहे.

'खोटारडेपणा बंद करा' -

जीएसटीचे पैसे यायचे आहेत, असं सरकारने म्हटलं आहे. पण, वित्त राज्य मंत्र्यांनी जीएसटीच्या पैशांबाबत आकडेवारी दाखवत दावा खोटा असल्याचं सांगितलं आहे. या सरकारने बहाणेबाजी बंद केली पाहिजे. तत्काळ पेट्रोल-डिझेलवरील व्हॅट कमी करून जनतेला दिलासा दिला पाहिजे. आपला खोटारडेपणा बंद केला पाहिजे, अशी टीकाही फडणवीसांनी केली.

'सेक्युलर पक्ष जातीयवादाला जबाबदार'

देशातील जातीय परिस्थिती आणि सांप्रदायिकतेचे जनतेचे जनक श्युडो सेक्युलर पक्ष आहेत. त्यांनी लांगुलचालनाच्या माध्यमातून देशात बहुसंख्य आणि अल्पसंख्याकांची दरी तयार केली आहे. अल्पसंख्याकांचं लांगुलचालन करून दुर्भावना तयार केली आहे. मोदींच्या योजना सर्वांना लागू आहेत. ते जाती-धर्मात भेदभाव करत नाहीत. पण, काही पक्ष अल्पसंख्यकांचं लांगूलचालन करतात, असा आरोप देवेंद्र फडणवीसांनी केला.