उद्धव ठाकरेंची सेटिंग कितीची?- किरीट सोमय्या

मुंबई : मुलुंडचे डम्पिंग ग्राऊंड बंद करणार नाही, असे सांगणारे उद्धव ठाकरे नंतर ते बंद करणार, असे सांगतात. उद्धव ठाकरे यांनी संबंधित आकृती बिल्डरशी किती कोटींची सेटिंग केली, असा सवाल खासदार किरीट सोमय्या यांनी केला आहे.

मुलुंड, गोवंडी, देवनार डंम्पिंग ग्राऊंड बंद करण्यासाठी अनेक जण काही वर्षांपासून प्रयत्न करत आहेत. मुंबई उच्च न्यायालयापासून केंद्र सरकारनेही याबाबत महापालिकेला निर्देश दिले आहेत. तरीही मुंबई महापालिकेतील माफिया हे डम्पिंग ग्राऊंड बंद होऊ देत नाहीत, असा आरोप सोमय्या यांनी केला आहे. गेल्या आठवड्यात उद्धव यांच्या सांगण्यावरून खासदार राहुल शेवाळे यांनी शिवसेना भवनात तातडीने पत्रकार परिषद घेतली.

किरीट सोमय्या मुलुंडचे डम्पिंग ग्राउंड हे बंद करू इच्छितात. कारण, त्यामुळे कोणा बिल्डरचा फायदा होणार असा, आरोप शेवाळे यांनी केला होता. उद्धव यांनी मुलुंड येथील सभेत डम्पिंग ग्राऊड बंद होऊ देणार नाही, असे जाहीर केले होते. आता ते बंद करण्यासाठी आकृती बिल्डरशी उद्धव यांनी किती कोटींची सेटिंग केली, असा सवाल सोमय्या यांनी विचारला आहे. याबाबत त्यांनी पत्रकारांना ई-मेल पाठवला आहे.