ईडी काय नर्सरी आहे का जिथे लहान मुले खेळतात? नितेश राणेंचा संतप्त सवाल

मुंबई: मागील काही दिवसांपासून राज्यातील राजकीय वातावरण वेगवेगळ्या केंद्रीय संस्थांच्या कारवायांमुळे चागलचं ढवळलं आहे. त्याच पार्श्वभूमीवर आता ठाकरे कुटुंबीयांचे निकटवर्तीय ईडीच्या (ED) रडारवर आहेत. मुख्यमंत्री उद्धव ठाकरे (CM Uddhav Thackeray) यांचे मेहुणे व रश्मी ठाकरे (Rashmi Thackeray) यांचे सख्खे भाऊ श्रीधर पाटणकर (Shridhar Patankar) यांच्यावर ईडीने कारवाई केली आहे. त्यामुळे विरोधकांनी ठाकरे सरकारवर निशाणा साधला आहे. दरम्यान, आता भाजपाचे नितेश राणे (Nitesh Rane) यांनी मुख्यमंत्री उद्धव ठाकरेंवर हल्लाबोल केला आहे.

नितेश राणे यांनी म्हटलंय की, मी पहिल्या दिवसापासून बोलतोय की, नंदकिशोर चतुर्वेदी हा कुणाचा फ्रंटमॅन आहे? कुणाच्या सांगण्यावरुन चालतोय? तो कुणाचा पार्टनर आहे, याची चौकशी करा. त्याच्या माध्यमातून पैसा फिरलेला आहे. त्यामुळे त्याची चौकशी व्हायला हवी. मार्च 2019 मध्ये आदित्य ठाकरे कंपनीत ते पार्टनर होते. त्यांची नेमकी काय लिंक आहे? जो माणूस हवाला करतो आहे, तो महाराष्ट्रातील सिटींग मंत्र्यासोबत संबंध असतील त्याने महाराष्ट्राच्या जनतेसमोर येऊन उत्तर दिलं पाहिजे ना? चतुर्वेदी यांचा मनसुख हिरण तर होणार नाही ना? याबाबत मला शंका आहे. त्याला प्रोटेक्शन दिलं पाहिजे.

पुढे ते म्हणाले की, महाराष्ट्रावर आक्रमण वगैरे म्हणत आहेत, ते यांचं ढोंग आहे. यांना बिझनेसमध्ये मराठी माणूस दिसत नाही. तेंव्हा चतुर्वेदी आणि पटेल हवे असतात. तेंव्हा का नाही मराठी माणूस दिसले? खिशे भरण्याच्या वेळी यांना हे लोक दिसतात. ईडी काय नर्सरी आहे का जिथे लहान मुले खेळतात? सखोल तपास करुनच ते कारवाई करतात. पुरावे बघूनच ते कारवाई करतात. सगळी बाजू तपासूनच ते करतात. ते कुणावरही अन्याय करत नाही. म्हणूनच त्यांनी पुराव्यानिशी संपत्ती जप्त केली आहे.