ऊर्जामंत्री नाराज, राज्य सरकार मदत करत नसल्याचा आरोप

नागपूर : वीजेच्या मुद्द्यावरून राज्यसरकार आणि ऊर्जामंत्री नितीन राऊत (Minister Nitin Raut) यांच्यामध्ये आलबेल नसल्याचं दिसतंय. त्यांनी राज्य सरकारबाबत (Maharashtra Government) तशी नाराजी बोलून दाखवली आहे. कर्ज मिळत नाही आणि वसुली होत नाही. त्यातच राज्य सरकार आम्हाला मदत करत नाही, असा थेट आरोप नितीन राऊतांनी केला.

विजेची रात्री जास्त गरज असते. वीजेची मागणी वाढत आहे. पण, त्यासाठी पैसा लागणार आहे. राज्याच्या मंत्रिमंडळात चर्चा होऊनही ग्रामविकास आणि नगरविकास खात्याचा निधी आम्हाला प्राप्त झालं नाही. शेवटी नाईलाजानं मुख्यमंत्री उद्धव ठाकरेंपर्यंत ही बाब पुढं नेणं आणि मोठ्या नेत्यांना कळवणे मला योग्य वाटलं, असं ऊर्जामंत्री नितीन राऊत म्हणाले.

देशात कोळशाची टंचाई निर्माण झाली. त्यावेळी राज्यात अंधार पडू दिला नाही. अतिवृष्टी आणि महापुराच्या संकटात मदत केली. वीज ही प्रत्येकाची गरज आहे. यामध्ये अडथळे येत असतील तर मोठ्या नेत्यांपर्यंत ही माहिती पोहोचवणं हे राज्याचा मंत्री म्हणून माझं कर्तव्य आहे. राज्य शासनाकडून पैसे मिळाले तर आम्हाला वीज जोडणी सुलभ करता येईल, असंही ऊर्जामंत्री म्हणाले.

काँग्रेस पक्ष म्हणून ऊर्जा खातं आमच्याकडे असलं तरी महाविकास आघाडीने एकत्र म्हणून काम करावं, अशी आमची मागणी आहे. मुख्यमंत्र्यांनी मला वेळ दिली असून त्यांच्यासोबत चर्चा करणार आहे. राज्याच्या हिताचा निर्णय घेतला जाईल. शेतकऱ्यांच्या बाबतील देखील मोठा निर्णय घेतला जाईल, असंही राऊतांनी सांगितलं. महावितरण आज फायद्यात नाही. पण, येत्या काही दिवसांत लाभ मिळविण्याचा फायदा करून देऊ, असं ते म्हणाले.