जलयुक्त शिवारासाठी 1500 कोटींची तरतूद : मुनगंटीवार 

मुंबई : सूक्ष्म सिंचनासाठी 432 कोटींची तर विहिरींसाठी 132 कोटींची तरतूद करण्यात आली आहे. तसेच राज्यातील जलयुक्त शिवार या योजनेसाठी 1500 कोटी रुपयांची तरतूद करण्यात आली आहे, अशी माहिती राज्याचे अर्थमंत्री सुधीर मुनगंटीवार यांनी आज (शुक्रवार) विधानसभेत दिली.

2018-19 या वर्षासाठीचा अर्थसंकल्प अर्थमंत्री मुनगंटीवार सादर करत आहेत. मुनगंटीवार यांच्या कार्यकाळातील हा चौथा अर्थसंकल्प आहे. यावेळी मुनगंटीवार यांनी विविध योजनांसाठी आर्थिक तरतूदींची घोषणा केली. ते म्हणाले, ''शिवस्मारकाची निविदा अंतिम टप्प्यात असून, या शिवस्मारकासाठी 300 कोटींची तरतूद करण्यात आली आहे. याशिवाय आंबा आणि काजू उत्पादन वाढवण्यासाठी 100 कोटींची तरतूद करण्यात आली आहे. तसेच जलसंपदा विभागासाठी 8233 कोटींची तरतूद करण्यात आली असून, जलयुक्तशिवारासाठी 1500 कोटींची तरतूद करण्यात आली आहे''.