विद्यार्थिनींना पाच रुपयांत सॅनेटरी नॅपकीन देणार

सकाळ न्यूज नेटवर्क
गुरुवार, 1 जून 2017

मुंबई - राज्यात अस्मिता योजना राबविण्यात येणार असून, या योजनेअंतर्गत महिला बचत गटांद्वारे सॅनेटरी नॅपकीन सवलतीच्या दरात देणार आहेत. तसेच शाळेतील मुलींना पाच रुपयांत सॅनेटरी नॅपकीन देण्यात येणार आहे. यामध्ये प्रत्येक गावात एका महिला बचत गटाची निवड करण्यात येणार आहे. बचत गटांना व्यवसायास वाव मिळणार आहे. या योजनेत सरकारची गुंतवणूक राहणार नसल्याचे ग्रामविकासमंत्री पंकजा मुंडे यांनी सांगितले.

ग्रामीण घरकुल योजनेतील घरकुलपात्र परंतु घरकुल बांधकामासाठी स्वत:ची जागा नसल्यामुळे घरकुलाच्या लाभापासून वंचित असलेल्या कुटुंबांना 500 चौरस फूट जागा खरेदीसाठी 50 हजारांपर्यंत अर्थसाहाय्य देण्यासाठी पंडित दीनदयाळ उपाध्याय घरकुल जागा खरेदी अर्थसाहाय्य योजना सुरू करण्यात आली आहे. यामुळे लाभार्थ्यांचा जागेचा प्रश्न सुटलेला असून, जर गावात जागा नसेल तर गावाबाहेर जागा घेऊन त्या ठिकाणी एकत्रित सर्व जाती धर्मांचे लोक राहणार असल्याचे मुंडे यांनी सांगितले.

प्रधानमंत्री आवास योजना, ग्राम विद्युत व्यवस्थापक, मुख्यमंत्री ग्रामसडक योजना, पंतप्रधान ग्रामसडक योजना, आपले सरकार सेवा केंद्र, स्मार्ट ग्राम योजना, चौदावा वित्त आयोग, आमचं गाव आमचा विकास आदी योजनांचा आढावा मुंडे यांनी या वेळी घेतला.

Web Title: mumbai maharashtra news girl student sanitary napkin gives in 5 rupees