'या' सेलिब्रिटींचा तनुश्रीला पहिल्यांदा पाठिंबा ! ; बघा व्हिडीओ

माजी मिस इंडिया आणि अभिनेत्री तनुश्री दत्ताने अभिनेता नाना पाटेकर यांच्यावर 'माझ्याशी जवळीक साधण्याचा प्रयत्न करत असभ्य वर्तन केले आहे,' असा आरोप केला आहे. या मुद्द्याची चर्चा जास्तच रंगली आहे. सिनेसृष्टीत काहींनी या मुद्द्यावर विचारले असता मौन पाळले तर काहींनी तनुश्रीला पाठिंबा दर्शविला आहे. 

तनुश्रीने एका मुलाखतीत मी टू (#metoo) मोहिमेबद्दल बोलताना नाना यांनी आपल्याशी केलेल्या गैरवर्तनाचा उल्लेख केला. त्यानंतर सोशल मिडीयावर काही कलाकारांनी #IBelieveYouTanushreeDutta हा ट्रेंड सुरु केला. या ट्रेंड अंतर्गत या कलाकारांनी तनुश्रीच्या भूमिकेचे समर्थन केले आहे. 

‘तनुश्रीवर टीका करण्यापूर्वी किंवा तिला अयोग्य ठरविण्यापूर्वी नीट विचार करा. कामाच्या ठिकाणी स्त्रियांना अशा गोष्टींना सामोरं जावं लागत आहे ही अत्यंत लाजिरवाणी गोष्ट आहे’, असे ट्विंकल खन्ना यांनी केले आहे. तर फरहान अख्तरने देखील ट्विट करत म्हटले की, 'तनुश्रीच्या हेतूवर प्रश्नचिन्ह उभे केल्यापेक्षा तिच्या हिम्मतीला दाद दिली पाहिजे.' फरहानच्या ट्विटला रिट्विट करत प्रियंकानेही तनुश्रीला पाठिंबा दर्शविला.

 

काय आहे प्रकरण ?
2008 साली 'हॉर्न ओके प्लीज' या सिनेमाचे शुटींग सुरु होते. तनुश्रीच्या सांगण्याप्रमाणे, 'या सिनेमासाठी ती एक गाणं शूट करत होती. तेव्हा नाना यांनी तिला आपल्या बाहुपाशात घेतलं. कोरिओग्राफर्सना दूर सारुन डान्स कसा करावा हे ते दाखवत होते.' यावरुन 10 वर्षांनी तनुश्रीने आवाज उठविला आहे. या प्रकरणावर तिने आता म्हटल्याप्रमाणे, 'जर एखादी महिला तिच्यावर झालेल्या अन्यायाविरोधात आवाज उठविते, तेव्हा आपल्या समाजात तिच्याच चारित्र्यावर संशय घेतला जातो. तिच्यावर विश्वास ठेवायला अजून समाज शिकलेला नाही. नाना यांना शिक्षा होईल किंवा नाही हा नंतरचा मुद्दा आहे. पण नाना सारख्या लोकांसोबत काम करणे सोडले पाहिजे. माझ्या सारख्या महिलांच्या मुद्द्यावर प्रश्नचिन्ह उभे करण्याऐवजी महिला अत्याचाराच्या मुद्द्यावर लोकांची साथ मिळणे गरजेचे आहे.'

संबंधित बातम्या :

•  नाना पाटेकर-तनुश्री दत्ता वाद; मराठी चित्रपटसृष्टीतील कलाकारांचे मौन 
•  ​राज ठाकरेंसारखा गुंड नेता असतो का?: तनुश्री दत्ता