असा आहे राष्ट्रीय पुरस्कारप्राप्त सर्वोत्कृष्ट हिंदी चित्रपट 'न्यूटन'

शुक्रवार, 13 एप्रिल 2018

'न्यूटन' चित्रपटाने प्रेक्षकांची जशी वाहवाई मिळवली तसाच पुरस्कारांच्या बाबतीतही हा चित्रपट सरस ठरला आहे.

'न्यूटन' हा हिन्दी चित्रपट बराच गाजला. अभिनेता राजकुमार राव याच्या न्यूटन या मुख्य पात्रासोबतच अभिनेत्री अंजली पाटील हिच्या मल्को, पंकज त्रिपाठी यांच्या पोलिस ऑफिसर या पात्रांना प्रेक्षकांनी खुप पसंत केले. मराठमोळा निर्माता अमित मसुरकरचा हा चित्रपट आहे.

उपहासात्मक कॉमेडी ड्रामा असलेला हा चित्रपट नक्षली भागातील खऱ्या परिस्थितीवर भाष्य करणारा आहे. छत्तीसगड येथे नक्षलवाद्यांचे साम्राज्य आहे. येथील जंगली भागात राहणाऱ्या लोकांवर तर सतत नक्षल्यांची भीती ठाण मांडून असते. अशात जर कधी येथे निवडणुकांची वेळ आली तर नक्षल्यांच्या भीतीने मतदानही होत नाही. हे मतदान रितसर पार पडावे यासाठी स्थानिक प्रशासनही नक्षल्यांच्या भीतीने धजावत नाही. ही सगळी परिस्थिती चित्रपटात मांडली आहे.  

या चित्रपटाने प्रेक्षकांची जशी वाहवाई मिळवली तसाच पुरस्कारांच्या बाबतीतही हा चित्रपट सरस ठरला आहे. इंटरनॅशनल फेडरेशन ऑफ फिल्म क्रिटीक्सचा बेस्ट इंटरनॅशनल फिल्म अवॉर्ड आणि नेटवर्क फॉर द प्रोमोशन ऑफ एशियन सिनेमाज् चा बेस्ट एशियन फिल्म अवॉर्ड 'न्यूटन'च्या खात्यात जमा आहेत. आता 'न्यूटन'ची 65 व्या राष्ट्रीय चित्रपट पुरस्कारात वर्णी लागली आणि 'न्यूटन'ला सर्वोत्कृष्ट हिंदी चित्रपटाचा राष्ट्रीय पुरस्कार जाहीर झाला. अभिनेता राजकुमार राव याने चित्रपटाला राष्ट्रीय पुरस्कार मिळाल्यानंतर ट्विट करत आनंद व्यक्त केला.  

आपण एका क्लिकवर ताजे अपडेट्स आपल्या मोबाईलमध्येही मिळवू शकता.

 

 

Web Title: Newton Got Best Hindi Movie In National Movie Award