‘जलशुद्धीकरण’ची मदार आठ मजुरांवर!

हरी तुगावकर
शुक्रवार, 18 मे 2018

लातूर - लातूर शहराला पाणीपुरवठा करणाऱ्या हरंगूळ येथील शुद्धीकरण केंद्रात काम पाहण्यासाठी अभियंत्याचा वानवा आहे. केंद्रातील प्रयोगशाळा अनेक वर्षांपासून बंद आहे. पाण्यात टाकण्यात येणाऱ्या ब्लिचिंग पावडरसाठी तयार करण्यात आलेली डोसिंग रूमही बंदच आहे. गेल्या काही वर्षांपासून या केंद्राची जबाबदारी केवळ आठ मजुरांच्या खांद्यावर आहे. पाच लाख लोकांच्या आरोग्याची काळजी ते प्रामाणिकपणे घेत आहेत. 

लातूर - लातूर शहराला पाणीपुरवठा करणाऱ्या हरंगूळ येथील शुद्धीकरण केंद्रात काम पाहण्यासाठी अभियंत्याचा वानवा आहे. केंद्रातील प्रयोगशाळा अनेक वर्षांपासून बंद आहे. पाण्यात टाकण्यात येणाऱ्या ब्लिचिंग पावडरसाठी तयार करण्यात आलेली डोसिंग रूमही बंदच आहे. गेल्या काही वर्षांपासून या केंद्राची जबाबदारी केवळ आठ मजुरांच्या खांद्यावर आहे. पाच लाख लोकांच्या आरोग्याची काळजी ते प्रामाणिकपणे घेत आहेत. 

शहराचा पाणीपुरवठा हा गेल्या काही दिवसांपासून चर्चेचा विषय बनला आहे. जलशुद्धीकरण केंद्राचेही तसेच. तुरटी, तसेच ब्लिचिंग पावडरची मात्रा वाढवून जलशुद्धीकरण केले जात आहे. शहरात नळाला मात्र पिवळे पाणी येत आहे. महापालिकेत बसणाऱ्या अभियंत्यांना गेल्या काही दिवसांपासून या पिवळ्या पाण्याचे कोडे उलगडता आलेले नाही. खरे तर पाच लाख लोकसंख्या असलेल्या शहरासाठी जलशुद्धीकरण केंद्र अद्ययावत असणे आवश्‍यक आहे; पण हरंगूळ येथील केंद्र मजुरांच्या हाती आहे. या केंद्रात एकही कायमस्वरूपी अभियंता कार्यरत नाही. 

डोसिंग रूम नावापुरती
या केंद्रात स्वतंत्र डोसिंग रूम आहे. येथून स्वयंचलित यंत्रणेद्वारे ब्लिचिंग पावडर, तुरटी पाण्यात सोडण्याची व्यवस्था आहे. ही यंत्रणाही अनेक वर्षांपासून बंद आहे. जलशुद्धीकरणाच्या ठिकाणीच ब्लिचिंग पावडर व तुरटी टाकली जात आहे. रंग बदलला तर अधिकारी फोनवरून मजुरांना आदेश देतात. त्यानुसार मजूर ब्लिचिंग पावडरची मात्रा वाढवतात. वर्षांनुववर्षे हा प्रकार सुरू आहे. यातूनच सध्या पिवळे पाणी कशामुळे येत आहे, याचा शोध महापालिकेच्या अभियंत्याला अद्यापपर्यंत लागलेला नाही. नूतन आयुक्त कौस्तुभ दिवेगावकर यांनी आता या प्रकाराकडे लक्ष द्यायला सुरवात केली आहे. त्यांनी संबंधितांना कामाला लावले आहे.

प्रयोगशाळा बंदच
जलशुद्धीकरण केंद्रात एक प्रयोगशाळा आहे. केमिस्ट नाही. एकच गाळणी परिचारक आहे. पाण्याची चव, रंग, वास, गढुळता, टीडीएस, कठीणता, पी. एच, आयर्न, ॲल्युमिनियम, नायट्रेट, सल्फेट, सल्फाईड, फ्लोराईड, क्‍लोराईड, अविशिष्ट क्‍लोरिन आदी तपासण्यासाठी प्रयोगशाळा आहे. ती गेल्या अनेक वर्षांपासून बंदच आहे. सध्या महापालिका जिल्हा प्रयोगशाळेकडून पाण्याची तपासणी करून घेत आहे. येथील प्रयोगशाळेतील साहित्य पडून आहे.

Web Title: Eight labors of water purification