औरंगाबाद - छत्रपती शिवाजी महाराजांच्या आजोबांची समाधी दुर्लक्षित 

औरंगाबाद - छत्रपती शिवाजी महाराज यांचे आजोबा मालोजीराजे भोसले यांच्या वेरूळ येथे असलेल्या समाधी परिसरात घाणीचे साम्राज्य पसरले आहे. हे समाधीस्थळ स्वच्छ व सुशोभित करण्यात यावे, अशी मागणी किसान व वॉटर आर्मीचे संस्थापक व सामाजिक कार्यकर्ते प्रफुल्ल कदम यांनी मुख्यमंत्री देवेंद्र फडणवीस यांच्याकडे केली आहे. 

याबाबत दिलेल्या निवेदनात म्हटले, की वेरूळ येथील या स्मारकास शासनाने मोजणी करून तारेचे कुंपण करून दिल्यास सुशोभीकरण व संवर्धनाची सर्व जबाबदारी आम्ही स्वत: घेऊ. घृष्णेश्वर मंदिरासमोरील समाधीजवळ असलेले घाणीचे साम्राज्य तत्काळ दूर करावे. त्याचबरोबर औरंगाबाद जिल्हाधिकारी यांनाही लेखी निवेदन पाठवून फोनवर चर्चा केली आहे. 

जगप्रसिद्ध वेरूळ लेणी व घृष्णेश्वर मंदिरासमोरच मालोजीराजे भोसले यांची उत्कृष्ट बांधकाम असलेली समाधी आहे. या समाधीसभोवताली अस्वच्छता असून, मराठी माणसासाठी ही लाजिरवाणी बाब आहे. रस्त्यालगत असलेल्या या समाधीजवळून हजारो भाविक व पर्यटक ये-जा करतात; परंतु घाणीमुळे या समाधीकडे फारसे कुणाचे लक्षही जात नाही. तेथे साधा फलकसुद्धा लावलेला नाही. या समाधीस्थळाचे ऐतिहासिक, पुरातत्त्वीय, सामाजिक, धार्मिक, सांस्कृतिक महत्त्व लक्षात घेऊन शासनाने यामध्ये त्वरित संवर्धन व सुशोभीकरणाची जबाबदारी घ्यावी. 

मालोजीराजे भोसले यांनी शिखर शिंगणापूर मंदिराचा जीर्णोद्धार केला व दुष्काळी भागात मोठा तलाव बांधला, याची माहिती तमाम शिवप्रेमीपर्यंत पोचायला हवी, अशी अपेक्षाही त्यांनी व्यक्‍त केली. या समाधीचा प्रश्‍न आता देशपातळीवर ऐरणीवर आणू, असे श्री. कदम यांनी निवेदनात म्हटले आहे.