क्षमता ओळखून क्षेत्र निवडा - प्रा. आर. जी. बीरादार

औरंगाबाद - बारावीचा निकाल लागला. आता नेमके कोणत्या शाखेत जायचे ते आधी ठरवा. अभियांत्रिकीत प्रवेश घ्यायचा असेल तर तेथील खर्च आणि राहण्याची व्यवस्था बघा. महाविद्यालय किती जुने यावर न जाता सध्या त्या महाविद्यालयात काय शिक्षण व संधी मिळते ते बघा. कुणाच्या सांगण्यावर क्षेत्र किंवा महाविद्यालय निवडण्याची चूक करु नका, असा सल्ला प्रा. आर. जी बिरादार यांनी दिला. 

सिडकोतील जगद्‌गुरु संत तुकाराम महाराज नाट्यगृहात आयोजित "यिन'च्या समर युथ समिटमध्ये सोमवारी (ता. 11) ते बोलत होते. 'सकाळ'च्या माध्यमातून मराठवाड्यातील युवकांशी संवाद साधण्याची संधी 20 वर्षांनंतर मिळाल्याचा आनंद त्यांनी बोलून दाखविला. 

इंजिनिअरींगच्या प्रवेश प्रक्रियेबद्दल बोलतांना ते म्हणाले की, न्यूनगंड बाळगू नका. पुण्या-मुंबईत चांगले शिक्षण मिळते मात्र मराठवाडाही चांगले शिक्षण देण्यात मागे नाही. पुण्यातील नावाजलेले सर्व विद्याशाखेतील प्राध्यापक बहुतांश मराठवाड्यातील आहेत. त्यामुळे आपली भाषा जर पुढच्याला समजत असेल तर त्याच भाषेत अभिव्यक्त व्हा. इंग्रजी शिका त्यामुळे तुम्हाला जास्त संधी मिळेल. आता अभियांत्रीकीची प्रवेश प्रक्रीया ऑनलाईन आहे. पर्यायी अर्ज भरताना कोड चुकू देऊ नका. स्वतः महाविद्यालय पाहिल्याशिवाय, तेथील विद्यार्थ्यांशी व शिक्षकांशी चर्चा केल्याशिवाय त्याला प्राधान्यक्रम देऊ नका. चार वर्ष अभ्यास करा. प्रत्येक कार्यामध्ये सहभागी व्हा. आत्मविश्‍वास वाढवा, सल्ला त्यांनी विद्यार्थ्यांना दिला.