रक्षा खडसे यांच्या कारची दुचाकीस्वाराला धडक 

आळंद - औरंगाबाद-जळगाव रस्त्यावरील आळंद (ता. फुलंब्री) येथे खासदार रक्षा खडसे यांच्या कारने धडक दिल्याने दुचाकीस्वार जखमी झाल्याची घटना सोमवारी (ता. 30) दुपारी तीनच्या सुमारास घडली. श्रीराम पुंडलिक पवार (वय 53, रा. देऊळगाव कमान, जि. जालना) असे जखमीचे नाव आहे. 

श्रीराम पवार हे दुचाकीने (एमएच-20 सीएच-5429) अंधारी फाटा येथे रस्ता ओलांडत असताना त्यांना इनोव्हा कारने (एमएच-19 सीई-1919) धडक दिली. यात ते जखमी झाले. डोके व हाताला मार लागल्याने त्यांना तत्काळ रुग्णालयात दाखल करण्यात आले. कारमधून माजी महसूलमंत्री एकनाथ खडसे यांच्या सूनबाई तथा खासदार रक्षा खडसे या औरंगाबादकडे जात होत्या. धडक एवढी जबर होती की अपघातानंतर कारचे समोरील टायर फुटले. रक्षा खडसे यांनी रुग्णालयात जाऊन श्री. पवार यांच्या प्रकृतीची विचारपूस केली. यानंतर त्या पुढे निघून गेल्या. वडोद बाजार पोलिसांनी घटनास्थळी धाव घेतली.