#MarathaKrantiMorcha क्रांती दिनी महाराष्ट्र बंदची हाक 

औरंगाबाद, ता. 8 : मराठा आरक्षणसाठी गुरुवारी (ता. 9) महाराष्ट्र बंदची हाक देण्यात आली होती. अहिंसक, असहकार पद्धतीने ते आंदोलन करण्यावर शिक्‍कामोर्तब झाले आहे. औरंगाबादेत झालेल्या समन्वयकांच्या राज्यव्यापी बैठकीत बुधवारी (ता. 8) हा निर्णय घेण्यात आला. बंदमधून अत्यावश्‍यक सेवा वगळण्यात आल्या असून बंद न करण्याचा निर्णय घेतलेल्या जिल्ह्यांना यातून मुभा दिली आहे. 

राज्यव्यापी बैठकीनंतर समन्वयकांनी पत्रकार परिषदेत भूमिका स्पष्ट केली. समन्वयक म्हणाले, ""मराठा आरक्षणासाठी एकेक जीव जात आहे. तरुणांचा सरकारवर विश्‍वास राहिला नाही. मात्र, न्यायालयावर आणि आपल्या आंदोलनावर विश्‍वास ठेवला पाहिजे. समाजबांधवांनी आत्महत्या करु नयेत, तसेच कोपर्डी प्रकरण स्मरणात ठेऊन क्रांती दिनाचे आंदोलन शांततेत करावे, हिंसेला थारा देऊ नये.'' 

सरकारनेही शब्दछळ करु नये, आत्मबलीदान करणाऱ्यांना 50 लाखाची मदत आणि कुटूंबियांना नोकरीत घ्यावे. आंदोलनातून समाज बांधवावर गंभीर गुन्हे दाखल होत आहेत. मराठा समाजाची प्रतिमा मलीन करण्याचा प्रयत्न सरकार आणि समाजकंटकाकडून होतोय. त्यासाठी स्वत:लाच शिक्षा म्हणून 15 ऑगस्टपासून चुलबंद आंदोलन करण्यात येणार आहे. एकवेळचा अन्नत्याग करण्यात येईल. 

राज्यव्यापी बैठक तब्बल तीन तास चालली. राज्यभरातील बहुतांश जिल्ह्यांचे प्रतिनिधी उपस्थित होते, तर नऊ जिल्हा समन्वयकांनी संदेशाद्वारे आपण जो निर्णय घ्याल, तो आम्हाला मान्य असल्याचे कळविले होते. आंदोलनाबाबत प्रत्येकानी आपापली भूमिका मांडली. त्यानंतर महाराष्ट्र बंदचा निर्णय घेण्यात आला. 

- सुर्योदयापासून सुर्यास्तापर्यंत होणार महाराष्ट्र बंद 
- आंदोलनादरम्यानचे गुन्हे सरसकट मागे घेण्यात यावेत 
- गुन्हे मागे न घेतल्यास 15 ऑगस्टपासून चुलबंद आंदोलन 
- तालुका, जिल्हा स्तरावर 10 ऑगस्टपासून साखळी उपोषण 
- आत्महत्या रोखण्यासाठी 10 ते 12 संवाद यात्रा निघणार 

हज यात्रेकरुंनाही वाट देणार 
महाराष्ट्र बंदमधून अत्यावश्‍यक सेवा वगळण्यात आल्या आहेत. दवाखाने, मेडिकल सुरु राहतील. एसटी महामंडळाच्या वाहनाला टार्गेट करु नका, असे आवाहन समन्वयकांनी केले. आतापर्यंत रुग्णवाहिकांना जशी वाट करुन दिली. तसेच धार्मिक यात्रा म्हणजेच हज यात्रेकरुंनाही आंदोलक वाट करुन देतील. अशी आचारसंहिता महाराष्ट्र बंदसाठी तयार केली आहे.