मध्य, हार्बरवर रेल्वेचा मेगाब्लॉक

पश्‍चिम रेल्वेवरील वाहतूक सुरळीत राहणार
मुंबई - केवळ मध्य व हार्बर मार्गावर रविवारी मेगाब्लॉक घेण्यात येणार आहे. पश्‍चिम रेल्वेच्या वसई रोड ते विरार स्थानकांदरम्यान शनिवारी मध्यरात्रीपासून विशेष मेगाब्लॉक घेण्यात येत असला तरी तो रविवारी पहाटेपर्यंत संपणार आहे.

मध्य रेल्वेवरील मेगाब्लॉक
ठाणे ते कल्याणपर्यंतच्या धीम्या मार्गावर सकाळी 11.30 ते दुपारी 3.30 पर्यंत दुरुस्तीचे काम हाती घेण्यात येणार आहे. या वेळेत मुलुंड ते कल्याण स्थानकांदरम्यान लोकल जलद मार्गावरून धावतील. सकाळी 10.20 ते दुपारी 2.42 दरम्यान सीएसटीहून सुटणाऱ्या जलद मार्गावरील लोकल घाटकोपर, विक्रोळी, भांडुप व मुलुंड स्थानकावर थांबतील. सकाळी 11.22 ते दुपारी 3.28 दरम्यान ठाण्याहून सुटणाऱ्या जलद लोकल मुलुंड, भांडुप, विक्रोळी, घाटकोपर व कुर्ला येथे थांबतील. दुरुस्तीच्या कामांमुळे लोकल 10 ते 15 मिनिटे उशिरा धावतील.

हार्बर मार्ग
कुर्ला ते वाशी या दोन्ही मार्गांवर सकाळी 11.30 ते दुपारी 3.30पर्यंत दुरुस्तीची कामे हाती घेण्यात येतील. या वेळेत सीएसटी ते पनवेल-बेलापूर-वाशीहून सुटणाऱ्या सर्व लोकल बंद राहतील. सीएसटी-कुर्ला आणि वाशी-पनवेल मार्गावर विशेष लोकल चालविण्यात येतील. या मार्गावरील प्रवाशांना सकाळी 10 ते दुपारी चार वाजेपर्यंत ट्रान्स हार्बर आणि मुख्य मार्गावरून प्रवास करण्याची मुभा देण्यात आली आहे.

पश्‍चिम रेल्वे
या मार्गावर रविवारचा नियमित मेगाब्लॉक घेण्यात येणार नाही. फक्त वसई रोड ते विरार स्थानकांदरम्यान दोन्ही मार्गांवर शनिवारी (ता. 16) मध्यरात्री 12.30 ते पहाटे 4.15 पर्यंत विशेष मेगाब्लॉक घेण्यात येईल. यादरम्यान, बोरिवली-वसई रोड ते विरार या दोन्ही मार्गांवरील धीम्या लोकल जलद मार्गावरून चालविण्यात येतील.