मराठीच्या अस्मितेसाठी मनसेचे पुन्हा "खळ खट्याक'

- कुणाल जाधव
शुक्रवार, 3 मार्च 2017

मुंबई - मुंबई महानगरपालिकेच्या निवडणुकीत केवळ सात नगरसेवक निवडून आणण्यात "महाराष्ट्र नवनिर्माण सेने'ला (मनसे) यश आले आहे. या सुमार कामगिरीनंतर संघटनेला नवी ऊर्जा देण्याचा मनसेचा मानस आहे. त्यासाठी मराठी अस्मितेच्या "शिळ्याच कढीला' नव्याने "ऊत' आणण्याचा प्रयत्न पक्षाकडून सुरू आहे. रेल्वे तिकीट आणि वीजबिलावर आलेल्या गुजराती भाषेच्या निमित्ताने मराठी भाषा वाचविण्यासाठी आगामी काळात मनसे तीव्र आंदोलन करणार असल्याची माहिती समोर येत आहे.

राजकीय महत्त्वाकांक्षेतून जन्माला आलेल्या मनसेने सुरवातीपासूनच भाषिक अस्मितेचा मुद्दा लावून धरला. परप्रांतीयांना केलेली मारहाण, दुकानांवर मराठी पाट्यांसाठी धरलेला आग्रह अशा अनेक आंदोलनांतून पक्षाने सवंग लोकप्रियता मिळविली होती. गेल्या विधानसभा आणि लोकसभा निवडणुकांमध्ये या लोकप्रियतेच्या जोरावर पक्षाला चांगले यशही मिळाले. मात्र, त्यानंतरच्या काळात ठोस कार्यक्रम राबविण्यात आलेले अपयश आणि सामान्यांशी तुटलेली नाळ यामुळे मनसेची अवस्था केविलवाणी झाली. 2014 च्या विधानसभा निवडणुका आणि नुकत्याच झालेल्या मुंबई महानगरपालिकेच्या निवडणुकीत मनसेला चांगलाच "धक्का' बसला. या दुष्टचक्रातून बाहेर पडण्यासाठी मनसे अध्यक्ष राज ठाकरे यांनी विधानसभा निवडणुकीआधी स्वतः निवडणूक लढविण्याचे जाहीर केले होते. मात्र थंड प्रतिसादामुळे त्यांनी तो मुद्दा गुंडाळला.

यंदाच्या पालिका निवडणुकांमध्ये विकासकामांबाबत चर्चा करून मनसेने पुन्हा आपला "पिंड' बदलण्याचा प्रयत्न केला. तरीही नाशिक महानगरपालिकेतील सत्तेतून मनसेला पायउतार व्हावे लागले आणि मुंबईत नगरसेवकांचा आकडा 27 वरून 7 वर घसरला. त्यामुळे विकासकामांची चर्चा करूनही आपली "डाळ' शिजत नसल्याचे मनसेच्या लक्षात आले आहे. म्हणूनच पुन्हा एकदा मराठी अस्मितेचा झेंडा खांद्यावर घेतच "मनसे स्टाईल' आंदोलन करण्याच्या पवित्र्यात आहे.

पश्‍चिम उपनगरातील बोरिवलीतील मनसे उपाध्यक्ष नयन कदम यांनी गुजराथी भाषेत वीजबिल पाठविल्याबद्दल "रिलायन्स एनर्जी'ला पत्र लिहून नाराजी व्यक्त केली आहे. तसेच भविष्यात मराठी भाषेच्या संवर्धनासाठी आंदोलन करण्याचा इशाराही दिला आहे. आता हाच मुद्दा घेऊन मनसे पुन्हा नव्याने "खळ खट्याक' आंदोलनाच्या तयारीत असल्याची माहिती मनसेच्या कार्यकर्त्यांकडून देण्यात येत आहे.

मुंबईतील वीजबिले आणि रेल्वेच्या तिकिटांवर गुजराती भाषा छापली जाणे, ही छपाईतील चूक असू शकत नाही. देशातल्या प्रत्येक भाषेविषयी पक्षाला आदर आहे. पण आमच्यावर इतर भाषा लादण्याचे प्रकार नक्कीच हाणून पाडणार.
- अमेय खोपकर, उपाध्यक्ष, मनसे

मुंबई

मुंबादेवी : आज रविवारच्या सुट्टीचा मुहूर्त साधत दक्षिण मुंबईची शान म्हणून ओळखला जाणारा "देव माझा उमरखाडीचा राजा" गणरायाची मिरवणूक...

09.54 AM

मुंबई - आमचा नंदीबैल दररोज शेकडो आबालवृद्धांना आशीर्वाद देतो... आज आमच्या कुटुंबाला त्याच्या आशीर्वादाची आवश्‍यकता आहे......

05.06 AM

ठाणे - ठाणे स्थानकात उभारण्यात आलेल्या महात्त्वाकांक्षी सॅटीस पुलाला गळती लागली आहे. पावसाचे पाणी थेट पुलाखालून मार्गक्रमण...

04.15 AM