मुंबई : सोमवारी यंग लीडर अॅस्पिरेशन डेव्हलपमेंट प्रोग्रामचे उदघाटन

मुंबई : यंदाच्या शैक्षणिक वर्षात बारावीची परीक्षा दिलेल्या आणि मागील वर्षी उत्तीर्ण झालेल्या तब्बल २५ हजार विद्यार्थ्यांना एचसीएल या नामांकित कंपनीच्या माध्यमातून आयटीचे प्रशिक्षण आणि शिक्षण उपलब्ध करून देणाऱ्या महाराष्ट्र यंग लीडर अॅस्पिरेशन डेव्हलपमेंट (एमवायएलएपी) या महत्वाकांशी प्रोग्रामचे सोमवारी, ६ जून रोजी मुख्यमंत्री उद्धव ठाकरे यांच्या हस्ते उद्घाटन होणार आहे.

यावेळी उपमख्यमंत्री अजित पवार, महसूलमंत्री बाळासाहेब थोरात, उद्योगमंत्री सुभाष देसाई, शालेय शिक्षण मंत्री वर्षा गायकवाड, राज्यमंत्री बच्चू कडू, पर्यावरण मंत्री आदित्य ठाकरे आदी मंत्री उपस्थित राहणार आहेत.

महाराष्ट्र यंग लीडर अॅस्पिरेशन डेव्हलपमेंट प्रोग्रामसाठी बारावी विज्ञान शाखेतून गणित विषय घेऊन सन २०२१ मध्ये बारावी उत्तीर्ण झालेले आणि ६० टक्के गुण असलेले विद्यार्थी व सन २०२२ या वर्षी विज्ञान शाखेतून गणित विषय घेऊन बारावी परीक्षा दिलेल्या विद्यार्थ्यांची संबंधित जिल्यास्तरावर नोंदणी करण्यात येणार असून ही नोंदणीही ६ जूनपासून WWW.HCLTECHBEE.COM या संकेतस्थळावर करता येणार असल्याची .माहिती मुंबई शिक्षण उपसंचालक संदीप संगवे यांनी दिली.

पहिल्या सहा महिन्याच्या प्रशिक्षणानंतर सहा महिने विद्यार्थ्यांना १० हजार रूपयांचे मानधन दिले जाणार आहे. या नंतर यशस्वीरित्या एक वर्षाचे प्रशिक्षण पूर्ण केलेल्या विद्यार्थ्यांना याच कंपनीमध्ये आयटी प्रोफेशनल म्हणून पदवीचे शिक्षण आणि त्यानंतर लाखो रूपयांचे पॅकजसह 100 टक्के नोकरी आणि शिष्यवृत्तीही दिली जाणार असल्याची माहिती देण्यात आली.