एअर इंडियाचा अधिकारी सोने तस्करीत अटकेत 

मुंबई - सोने तस्करीप्रकरणी एअर इंडियाच्या अधिकाऱ्याला हवाई गुप्तचर विभागाने (एआययू) गजाआड केले. त्याच्याकडून 44 लाख 10 हजारांचे सोने जप्त करण्यात आले. सहार विमानतळावर मंगळवारी (ता. 14) रात्री एआययूचे अधिकारी गस्तीवर होते. त्या वेळी एअर इंडियाच्या सेवा अभियांत्रिकी विभागाचा वरिष्ठ अधीक्षक जनार्दन गुणाजी कोंडविलकर याची त्यांनी झडती घेतली. त्या वेळी त्याच्याकडे सोन्याचे आठ तुकडे सापडले. विमानतळाबाहेर उभ्या असलेल्या जगदीश रावल याला हे सोने दिले जाणार होते. दोघांचाही जबाब नोंदवण्यात आला आहे. सोने तस्करीत विमानतळावरील अधिकारीच सापडल्याने खळबळ उडाली आहे.