विद्रोही शाहिर शंतनु कांबळे​ यांचे निधन

संजय शिंदे
बुधवार, 13 जून 2018

मुंबई - विद्रोही शाहिर शंतनु कांबळे​ (वय 40) यांचे आज ता. 13 रोजी दीर्घ आजाराने नाशिक येथे दुपारी 2 वाजता बिर्ला रुग्णालयात निधन झाले. त्यांच्यामागे पत्नी दीपाली व मुलगा असा परिवार आहे. 

मुंबई - विद्रोही शाहिर शंतनु कांबळे​ (वय 40) यांचे आज ता. 13 रोजी दीर्घ आजाराने नाशिक येथे दुपारी 2 वाजता बिर्ला रुग्णालयात निधन झाले. त्यांच्यामागे पत्नी दीपाली व मुलगा असा परिवार आहे. 

शाहीर शंतनू कांबळे गेल्या काही वर्षांपासून पोटाच्या विकाराने त्रस्त होते. तब्येत बिघडल्याने गेल्या आठवड्यात त्यांना नाशिकच्या बिर्ला हॉस्पिटलमध्ये अॅडमिट करण्यात आले होते. गेल्या काही दिवसांपासून ते व्हेंटिलेटरवर होते. आज प्रकृती अधिकच खालावल्याने त्यांची प्राणज्योत मालवली. नव्या शाहीरांसाठी प्रेरणादायी असलेले शंतनू हे मुळचे सांगलीतील तासगावचे होते. मुंबईतल्या वडाळा येथे राह्यचे. मात्र आजारपणानंतर ते नाशिकला स्थायिक झाले होते. 

2005 मध्ये शंतनू यांना नक्षलवाद्यांशी संबंध असल्याच्या आरोपावरून नागपूर पोलिसांनी अटक केली होती. रायपूर येथे आदिवासींच्या कार्यक्रमात सहभागी होण्यासाठी गेले असता त्यांना अटक करण्यात आली होती. त्यांना 100 दिवस पोलीस कोठडीत ठेवण्यात आले होते. मात्र तपासाअंती कोर्टाने त्यांची निर्दोष मुक्तता केली होती. पोलिसांनी तुरुंगात प्रचंड मानसिक आणि शारिरीक छळ केल्याचा आरोप त्यांनी केला होता. तुरुंगातून बाहेर आल्यानंतर ते अंथरुणाला खिळले होते. त्यातच त्यांना क्षयाची लागण झाली होती. त्यातून बरे झाल्यानंतर त्यांनी वडाळ्याहून नाशिकला मुक्काम हलवला होता. मात्र नाशिकमध्ये आल्यानंतरही आजाराने त्यांची पाठ सोडली नव्हती. 

गेली अनेक वर्षांपासून विद्रोही सांस्कृतिक चळवळ आणि जातीअंताच्या लढाईत ते अग्रेसर होते. गाणी आणि कवितातून ते जातीय अत्याचार, शोषण, आर्थिक-सामाजिक विषमता आणि मानवतावादावर भाष्य करत असायचे. 'दलिता रे हल्ला बोल ना...श्रमिका रे हल्ला बोलं ना...' आणि 'समतेच्या वाटेनं, खणकावत पैंजण यावं तू यावं, तू यावं, तू यावं बंधन तोडीत यावं...' त्यांची आदी गीते चळवळीत लोकप्रिय होती. अत्यंत गाजलेला 'कोर्ट' हा सिनेमा त्यांच्या आयुष्यावर बेतलेला होता. ते 'विद्रोही' मासिकाच्या संपादक मंडळावरही होते. त्यांच्या अकस्मिक निधनावर जागर लढाऊ लोककला आघाडी, लोकसांस्कृतिक मंचसह विविध विद्रोही सांस्कृतिक संघटनांनी दु:ख व्यक्त केले आहे.

Web Title: shahir shantanu Kamble passed away