आज हिंदू उद्या कोण? राज ठाकरेंच्या विरोधात बॅनरबाजी

मुंबई : राज ठाकरे यांच्या उत्तर सभेनंतर त्यांच्या भूमिकेवरुन शिवसेनेने त्यांना डिवचलं आहे. उत्तर सभेमध्ये राज ठाकरे यांनी शिवसेना आणि राष्ट्रवादी यांच्यावर हल्लाबोल केला होता. त्याला प्रत्युत्तर म्हणून शिवाजी पार्क परिसरात शिवसेनेने बॅनर लावले आहेत. हे बॅनर सध्या सोशल मीडियावर चर्चेत आहे.

दरम्यान, राज यांनी उत्तर सभेत हिंदुत्वाची भूमिका घेतली असून निवडणुकांच्या वेळी भाजवापर टीका करणाऱ्या राज ठाकरे यांनी आता शिवसेना आणि राष्ट्रवादीला लक्ष्य केल्याचं पाहायला मिळालं. दरम्यान आज शिवाजी पार्क परिसरात एक बॅनर झळकला आहे. दादर येथील शिवसेना भवन जवळ लागलेल्या या बॅनरवर तीन फोटोंची जागा आहे. त्यातील एक जागा रिकामी असून तिथे प्रश्नचिन्ह देण्यात आलं आहे.

राज ठाकरेंच्या पुढील भूमिकेवरील ते प्रश्नचिन्ह असल्याचं बोललं जातंय. एका फोटोत राज यांनी डोक्यात मुस्लिम टोपी घातली आहे. या फोटोला 'काल' अशी टॅगलाईन दिली आहे. दुसऱ्या रकान्यात हनुमान असं लिहिलं असून त्यासाठी 'आज' अशी टॅगलाईन दिली आहे. आणि तिसऱ्या रकान्यात प्रश्नचिन्ह दिसत असून त्याला 'उद्या' अशी टॅगलाईन आपल्याला दिसत आहे. अशा आशयाचे बॅनर झळकल्याने मीडियावर त्याची चर्चा रंगली आहे.

दरम्यान मनसेच्या पाडव्याच्या सभेतील वक्तव्यामुळे वाद पेटला होता. त्यांच्या वक्तव्यामुळे निर्माण झालेल्या प्रश्नांना उत्तर देण्यासाठी मनसेने उत्तर सभा आयोजित केली होती. या सभेत राज हे आपल्या भूमिकेवर ठाम असल्याचं पाहाला मिळालं. यावेळी त्यांनी शिवसेनेवर आणि राष्ट्रवादीवर हल्लाबोल केल्याचं पाहायला मिळालं. त्यानंतर निवडणुकांच्या वेळी भाजपावर टीका करणारे आता त्यांची बाजू घेताना दिसतात अशी टीका होत आहे. यावरुनच शिवसेनेने अशा प्रकारची बॅनरबाजी केल्याचं पहायला मिळतंय.