ठाणे - शिवसेनेचे शहापूर तालुका उपप्रमुख शैलेश निमसे यांची हत्या 

शहापूर (ठाणे) : गुरुवारी मध्यरात्री निमसे यांना अज्ञात व्यक्तीचा फोन आल्याने ते बाहेरून घराच्या दरवाजाची कडी लावून आपल्या हुंडाई सोनाटा कारने बाहेर पडले. त्यानंतर थेट त्यांचा मृतदेह भिवंडी तालुक्यातील देवचोळे गावच्या हद्दीतील जंगलात जळालेल्या अवस्थेत शुक्रवारी सकाळी आढळून आला. तर त्यांची कार ५ किमी. अंतरावरील घाडणे, चिंचवली गावच्या हद्दीत आढळून आली. या घटनेची माहिती समजताच परिसरातील शिवसैनिकांनी घटनास्थळी धाव घेवून घटनेचा निषेध केला. 

 गंभीर घटनेची माहिती मिळताच गणेशपुरी उपविभागीय पोलीस अधिकारी कृष्णत काटकर, ठाणे ग्रामीण गुन्हे शाखेचे वरिष्ठ पोलीस निरीक्षक व्यंकटेश आंधळे, गणेशपुरी पोलीस ठाण्याचे पोनि. शेखर डोंबे आदींनी पोलीस पथकासह घटनास्थळी धाव घेवून मृतदेहाचा पंचनामा केला. त्यानंतर मृतदेह उत्तरीय तपासणीसाठी स्व. इंदिरा गांधी उपजिल्हा रुग्णालयात पाठवण्यात आला. मात्र मृतदेहाच्या न्याय वैद्यक तपासणीसाठी मुंबईतील जे. जे. रुग्णालयात रवाना केला आहे.

या घटनेने ठाणे आणि पालघर जिल्ह्यातील शिवसैनिकांमध्ये संतापाची लाट उसळली आहे. शिवसेना उपतालुकाप्रमुख निमसे यांचा खून पूर्वनियोजितपणे कट रचून केला आहे, असा आरोप ठाणे जिल्हा शिवसेना प्रमुख प्रकाश पाटील आणि पालघरचे नगराध्यक्ष उत्तम पिंपळे यांनी केला आहे. निमसे यांच्या हत्येत जंगली महाराज ट्रस्टच्या पदाधिकाऱ्यांचा हात असल्याचा संशय पत्नी साक्षी निमसे यांनी व्यक्त केला आहे. पतीच्या मारेकऱ्यांना तत्काळ अटक करावी, अशी मागणी त्यांनी केली. मात्र निमसे यांचा खून राजकीय वादातून की बांधकाम व्यवसायातून झाला? या दृष्टीने पोलिसांनी तपास सुरू केला आहे.