शिक्षकांना दांड्या भोवणार

शिक्षकांना दांड्या भोवणार

उल्हासनगर - निवडणूक प्रक्रियेत पारदर्शकता, शिस्त असावी यासाठी पालिकेचे आयुक्त राजेंद्र निंबाळकर यांनी विशेष प्रशिक्षण घेतले होते. त्यात शिक्षक व इतर विभागाचे कर्मचारी अशा २२५ जणांनी दांड्या मारल्या. शिक्षकांना त्या भोवण्याची शक्‍यता आहे. निंबाळकर यांनी खरमरीत नोटीस बजावताच या मंडळींनी गुरुवारी (ता.९) खुलासा करण्यासाठी पालिकेत धाव घेतली आहे.

निंबाळकर यांनी दांडीबहाद्दर शिक्षकांची चांगलीच हजेरी घेतली. गैरहजेरीचे कारण म्हणून देण्यात आलेल्या खुलाशात तफावत किंबहुना फसवेगिरी आढळल्यास शिस्तभंगाची कारवाई किंवा फौजदारी गुन्हे दाखल केले जाणार असल्याचा इशारा त्यांनी दिला. यामुळे दांडी बहाद्दरांची पाचावर धरण बसली आहे.

२१ फेब्रुवारीला होणाऱ्या निवडणुकीसाठी  कल्याण-डोंबिवली महानगरपालिका, भिवंडी-निजामपूर पालिका, अंबरनाथ नगर परिषद, परिसरातील शाळा आणि महाविद्यालयांचे शिक्षक, इतर सरकारी विभागातील कर्मचारी अशा एक हजार ५०० कर्मचाऱ्यांची नेमणूक केली आहे.  त्यांना प्रशिक्षित करण्यासाठी रविवारी (ता.५) टाऊन हॉल येथे सत्र घेण्यात आले. या सत्राला २२५ हून अधिक कर्मचारी गैरहजर होते. ही बाब निंबाळकर यांच्या निदर्शनास आली. त्यामुळे गैरहजेरीबाबत सर्व दांडीबहाद्दरांना नोटिसा बजावल्या. त्यांना गुरुवारी लेखी खुलाशासह भेटण्याचे आदेश निंबाळकर यांनी दिले होते.

प्रशिक्षणाला उपस्थित राहण्याची नोटीस उशिराने मिळाली, आजारी आहे, रजेवर आहे आदी खुलासे दांडीबहाद्दरांनी दिले असून त्याची शहानिशा केली जाणार असल्याचे आयुक्तांनी सांगितले.

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com